නිමන්ති රණසිංහ

ශ්‍රී ලංකා සිවිල් ගුවන්සේවා අධිකාරිය 2020 වසරේදී නිවෙස්වල සිට වැඩ කළ කාර්ය මණ්ඩල සාමාජිකයන්ට රුපියල් කෝටියකට වැඩි අමතර මුදලක් ගෙවා ඇතැයි ජාතික විගණන කාර්යාලය නිකුත් කළ වාර්තාවක සඳහන් වේ.

එම මුදල පෙර වසරට සාපේක්ෂව සියයට 37ක වැඩිවීමක් බව පෙන්වා දෙන විගණන නිලධාරීහු, එලෙස නිවාඩු මුදල් ගෙවීම විවාදාත්මක මෙන්ම සාධාරණීකරණය කළ නොහැක්කක් බව ද සඳහන් කරති. 

කොවිඩ් වසංගත තත්ත්වය හේතුවෙන් රටේ නිශ්චිත ප්‍රදේශ කලින් කලට අගුලු දැමීම හේතුවෙන් අධිකාරියේ කාර්ය මණ්ලයට නිවෙසේ රැඳී සිටීමටත්, නිවෙස්වල සිට වැඩ කිරීමටත් අවසර දී තිබූ අතර, මෙපමණ නිවාඩු මුදල් ප්‍රමාණයක් අනුමත කර ඇත්තේ එම කාලසීමාවේදී බව විගණන අංශ පෙන්වා දෙයි. 

මේ අතර සිවිල් ගුවන් සේවා අධිකාරිය 2019 වසරේදී රුපියල් කෝටි එකසිය තිස් හතරකට වැඩි ලාභයක් උපයාගෙන තිබූ අතර, එය 2020 වර්ෂයේදී කෝටි විසි තුනක් දක්වා සියයට 82.5කින් අඩු වී ඇතැයි විගණන වාර්තාවේ දැක්වේ. 

මේ තොරතුරු සඳහන් වන්නේ ශ්‍රී ලංකා සිවිල් ගුවන්සේවා අධිකාරියේ 2020 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය.