ඉන්දික හේවාවිතාරණ
සුදු සැරයටි හිඟය හා මිල ඉහළ යාම නිසා දෘශ්‍යාබාධිතයන් දුෂ්කරතාවට පත්ව සිටින බව ශ්‍රී ලංකා දෘශ්‍යාබාධිත ජනතා සම්මේලනය සඳහන් කරයි.
පසුගිය කාලයේදී රු. 450-500 අතර මිලකට අලෙවි වූ සුදුසැරයටියක මිල මේ වන විට රු. 1500 දක්වා ඉහළ ගොස් තිබෙන බවද එම සංගමයේ සහකාර ලේකම් චමීර පුබුදු කුමාර මහතා සඳහන් කළේය.
හාරලක්ෂ පනස් තුන්දහසක් පමණ වූ දෘශ්‍යාබාධිතයන්ගෙන්‍් සියයට අනූවකට වැඩි පිරිසකට ගමන් කිරීම සඳහා සුදු සැරයටිය අවශ්‍ය වන බවත් බිමට තට්ටු කරමින් ගමන් කරන නිසා කෙටි කාලයකදී එය අබලන් තත්ත්වයට පත් වන බවත් ඔහු සඳහන් කළේය.
ලෝකයේ ඇතැම් රටවල මේ වන විට නවීන ක්‍රමයට සකස් කළ සුදු සැරයටි භාවිත කළද මෙරට තිබෙන්නේ බිමට තට්ටු කර ගමන් යා යුතු සුදු සැරයටි පමණි. මෙහි ඉලාස්ටික් කැබැල්ලක් හා කුඩා බට කිහිපයක් පමණක් තිබෙන නිසා සුදු සැරයටිය ගැන නොතකා ජනතාව දෘශ්‍යාබාධිත පුරවැසියා ආසන්නයෙන් ගමන් කිරීම නිසා එයට හානි සිදුවන බවද පුබුදු කුමාර මහතා සඳහන් කළේය.
සුදුසැරයටි වැඩි වශයෙන් විනාශ ෙවන්නේ ත්‍රිරෝද රථවලට හසුවීමෙන් වන හෙයින් සුදු සැරයටි මිල අඩු කර අවශ්‍ය තරම් ගෙන්වීමේ වැඩපිළිවෙළක් සකස් කරන ලෙසට වර්තමාන ආණ්ඩුවෙන් ඉල්ලා සිටින බව ඒ මහතා පැවසීය.
සුදු සැරයටි මිල ඉහළ ගොස් තිබෙන්නේ විදේශ රටවලින් ගෙන්වීමේදී බදු අය කරන නිසා නම් බදු සහනයක් ලබා දී මිල අඩු කරන ලෙස ආණ්ඩුවෙන් ඉල්ලා සිටින බවද හෙතෙම සඳහන් කළේය.
