(රොමේෂ් මධුෂංඛ)

වවුනියාව කල්ලිකුලම් ප්‍රදේශයේදී පසුගිය 9දා තරුණයකු ඝාතනය කල බවට සැකකරන පුද්ගලයකු සැඟව සිටියදී අද (17) අලුයම අත්අඩංගුවට ගත් බවට වව්නියාව පොලිස් කොට්ඨාස නීතිය බලගැන්වීමේ ඒකකය කියයි.
 
වවුනියාව සින්නපුදුකුලම් ප්‍රදේශයේ පදිංචි 27 හැවිරිදි කේ. සුරේන්ද්‍ර ප්‍රකාශ්  තරුණයා පසුගිය 09 වනදා වවුනියාව කෝවිල්කුලම් ප්‍රදේශයේදී ත්‍රි රෝදයකින් රැගෙන ගොස් ඝාතනය කර කල්ලිකුලම් කැලෑවකදී මළ සිරුර පුලුස්සා තිබියදී පොලීසිය සොයාගෙන තිබිණි.
 
වවුනියාව පොලිස් කොට්ඨාස නීතිය බලගැන්වීමේ ඒකකය සතියක කාලයක් තුලදී සන්නිවේදන තාක්ෂණය යොදාගනිමින් ඝාතනය කළ බවට සැකකෙරෙන වවුනියාව මුරුගනූර් ප්‍රදේශයේ පදිංචි නඩරාජා ක්‍රිෂ්ණලෝජන් නැමති 25 හැවිරිදි තරුණයෙකු මාතර ප්‍රදේශයේ සැඟව සිටියදී අත්අඩංගුවට ගෙන ඇත.
 
අත්අඩංගුවට ගත් සැකකරු විසින් පසුව පොලීසියට කළ පාපොච්චාරණයකදී තමන් එම ඝාතනය කළ බවට වරද කළ බව පිළිගෙන ඇත. සැකකාර තරුණයා එම තැනැත්තාව ඕමන්ත කල්ලිකුලම් ප්‍රදේශයට රැගෙන ගොස් ඝාතනය කර ත්‍රි රෝද රථයේම ඉන්ධන ගෙන පුලුස්සා මියගිය තරුණයාගේ ගෙලේ තිබූ රන්මාලය හා මුදල් රුපියල් 2800 ක් රැගෙන පලා ගිය බවද පවසා ඇත.
 
ඝාතනය සඳහා යොදාගත් පිහිය ඇතුලු මිය ගිය තරුණයා සතුව තිබූ දෑ වැසිකිලි වළකට දමා තිබියදී පොලීසිය සොයගෙන ඇත. මිය ගිය තරුණයාගේ රන් මාලය මාතර ප්‍රදේශයේ රුපියල් 89,000කට උකස් කර තිබියදී එයද සොයාගැනීමට පොලිස් නිලධාරීන් පියවර ගෙන ඇත.

අත්අඩංගුවට ගත් සැකකරු අද (17) දින වව්නියාව අධිකරණයට ඉදිරිපත් කිරීමට පියවර ගෙන ඇත.