නාවික වෘත්තීය මානව සම්පත් පරිපාලන සේවා ක්ෂේත්‍රයේ ප්‍රමුඛයකු මෙන්ම ස්ත්‍රී පුරුෂ සමභාවිතාව වෙනුවෙන් පෙනී සිටින ආයතනයක් වන Centrum Marine Consultancy ආයතනය, පස්වැනි වරටත් පැවැත්වූ වාර්ෂික Maritime SheEO සමුළුවේ දී “Empowering Diversified Maritime Education” ගෞරව සම්මානයට පාත්‍ර විය.

  Peter Döhle Schiffahrts-KG සමග එක්ව දියත් කළ ‘She Can Sail the Seas’  කාන්තා සවිබල ගැන්වීමේ මූලිකත්ව වැඩසටහන හරහා ශ්‍රී ලංකාවේ ප්‍රථම වතාවට ආරම්භ කළ නාවික කැඩෙට්වරියන් පුහුණු කිරීමේ ප්‍රයත්නය උදෙසා මෙම සම්මානය හිමිවිය. මෙමගින් නාවික ක්ෂේත්‍රයේ ඇති ස්ත්‍රී පුරුෂ අසමතුලිතතාව අවම කිරීම සහ නාවික ක්ෂේත්‍රයේ දී කාන්තාවන්ට ද සමාන අවස්ථා උදාකර දීම වෙනුවෙන් Centrum Marine Consultancy ආයතනයේ කැපවීම පැහැදිලි වෙයි. 

 “Setting Sail for Equality: Empowering Women Leaders”  තේමාව යටතේ Maritime SheEO සමුළුව මුම්බායි නගරයේ TAJ Santacruz හිදී පැවැත්වුණු අතර එහිදී ගෝලීයව සිටින සියලු ප්‍රධාන අත්දැකීම් නිලධාරීන් එකතු කරගනිමින් නාවික ක්ෂේත්‍රයේ විවිධත්වයට අවස්ථාවක් ලබාදීමට සහ එකාත්මිකතාව ඇති කිරීමට අවකාශයක් නිර්මාණය කළේය. එම උළෙලේ දී ස්ත්‍රී පුරුෂ සමභාවී බව ප්‍රවර්ධනය කිරීම සහ එකාත්මිකතාවෙන් පිරි ශ්‍රම බලකායක් නිර්මාණය කිරීමේ සිය නව්‍ය ප්‍රවේශය හරහා Centrum Marine Consultancy ආයතනය අනෙක් ආයතන අතරින් කැපී පෙනිණි. 

2023 වසරේ දී දියත් කළ She Can Sail the Seas වැඩසටහන මගින් කැඩෙට් නිලධාරිනියන් 15 දෙනකුට පමණ ඇමරිකානු ඩොලර් 110,000 ට ආසන්න සම්පූර්ණ ශිෂ්‍යත්ව ලබා දී ඇත. මෙම වැඩසටහන වෘත්තීය අධ්‍යාපනය, ප්‍රායෝගික පුහුණුව ඒකාබද්ධ කරමින් නිර්මාණය කර ඇති අතර නිලධාරිනියකට අවශ්‍ය දැනුම වගේම ප්‍රායෝගිකභාවය මෙහිදී වඩාත් හොඳින් අවධාරණය වෙයි. 2029 වසරේ දී මෙම වැඩසටහන හරහා කෙඩෙට් නිලධාරිනියන් 200 ක් පමණ නිර්මාණය කිරීමට අපේක්ෂා කරන අතර ශ්‍රී ලංකාවේ නාවික ක්ෂේත්‍රයේ සුවිසල් ශක්‍යතාවකින් පිරි කාන්තා වෘත්තිකයන් පිරිසක් ගොඩනැංවීමට පෙරමුණ ගනී.

මෙම වැඩසටහනෙන් පරිපූර්ණ සංවර්ධනයක් දිරිගැන්වෙයි. කැඩෙට්වරියන්ට නායකත්ව පුහුණු කඳවුරු පැවැත්වෙයි. එසේම කථන පුහුණුව, ශාරීරික යෝග්‍යතාව ඉහළ නැංවීම, මානසික පරිපූර්ණත්වය සහ ඉංග්‍රීසි භාෂා දැනුම සංවර්ධනය කිරීම ද සිදුවෙයි.