අනුරාධපුර-දයාරත්න ඇඹෝගම
ස්වාභාවික විපත් හා වන අලි තර්ජන මැද මහවිලච්චිය ප්‍රාදේශීය ලේකම් කොට්ඨාසයේ හේන්වල මෙවර වගා කරන ලද වට්ටක්කා වගාවෙන් වැඩි අස්වැන්නක් ලැබි ඇතැයි ගොවීහු පවසති.
නිරන්තරයෙන් වන අලි ගම්වැදීම සිදුවන ප්‍රාදේශිය ලේකම් කොට්ඨාසයක් ලෙස විලචිචිය ප්‍රචලිතය. මෙවර මහ කන්නයේ දී වී හා අතිරේක බෝග ලෙස වට්ටක්කා වගා කටයුතුවල ගොවීහු නිරත වී සිටිති. පසුගිය වර්ෂා සමයේ යම් හානියක් සිදු වුව ද සාර්ථක ලෙස වට්ටක්කා වගා කරගත් ගොවීහු වැඩි අස්වැන්නක් ලබාගැනීමට සමත්ව සිටිති.
මේවන විට අස්වනු නෙළනු ලබන ගොවීන් මෙන්ම වගාව ආරම්භ කර පවත්වාගෙන යන ගොවීන් ද විශාල පිරිසකි. මෙම වගා කළ වට්ටක්කා හා වී වගා වන අලින්ගෙන් මෙන්ම වෙනත් සතුන්ගෙන් රැක ගැනීමට ඔවුන් මහත් වෙහෙසක් දරා සාර්ථක අස්වැන්නක් ලබාගැනීමට සමත්ව ඇතත් ඒවා සාධාරණ මිලකට අලෙවිකර ගැනීමට නොහැකිවී ඇතැයි ඔවුහු පවසති.
අනෙකුත් එළවළුවල මිල ඉහළ මට්ටමක පැවැතිය ද ඊට සාපේක්ෂව වට්ටක්කා මිල පහත වැටී ඇති බව ඔවුහු පවසති. ඉදිරියේදී කුඹුරුවල වගා කොට ඇති වට්ටක්කාවලද අස්වනු නෙළන විට තව දුරටත් වට්ටක්කා මිල පහත වැටීමේ දැඩි අවදානමක් තිබෙන බවද ගොවීහු පවසති.
එම නිසා පලදාව සාධාරණ මිලකට අලෙවි කර ගැනීමට අතරමැදියන් ගෙන් තොර ක්‍රමවේදයක් රජය සකස් කර දෙන්නේ නම් එය මහත් අස්වැසිල්ලක් බව එම ගොවීහු වැඩිදුරටත් පැවසුහ.
