දෙරණ "ඩ්‍රීම් ස්ටාර්" සිවුවැනි අදියරේ දෙවැන්නා බවට පත්වූ කුලියාපිටියේ රවීන් කණිෂ්ක වික්‍රමරත්න මේ දිනවල තරමක් කාර්යබහුල වී සිටියි. ඒ ඉදිරි කාලයේදී ඔහුගේ නවතම ගීත එකතුවක් රසික, රසිකාවියන්ට තිළිණ කිරීමට සැලසුම් කරමින් සිටීම හේතුවෙනි. එමෙන්ම මේ දිනවල දෙරණ රූපවාහිනි නාළිකාවේ විකාශය වන දෙරණ "ස්ටාර් සිටි" රියලටි වැඩසටහනේ දුලීකා මාරපනගේ ප්‍රමුඛත්වයෙන් තරග කරන "සුපර් ගැන්ජෙස්ටර්" කණ්ඩායමේ සාමාජිකයෙකු ලෙසද ඔහු කටයුතු කරයි. ඉදිරි කලා නිර්මාණ පිළිබඳව ඔහු "සාරවිට" අපිට මෙසේ දැනුම්වත් කළෙමු.
"අවුරුදු මාසේ නිසා තරමක් ප්‍රසංග සඳහා ලැබෙන ආරාධනාවල වැඩිවීමක් තියෙනවා. ලංකාවේ සෑම ප්‍රදේශයකින්ම ආරාධනා ලැබෙන නිසා තරමක් දුරට සංගීත කටයුතු පැත්තෙන් මමත් මගේ සංගීත කණ්ඩායමත් කාර්යබහුල වෙලා තියෙනවා. ඊට අමතරව දෙරණ රූපවාහිනි නාළිකාවේ විකාශය වන "ස්ටාර් සිටි" රියලටි වැඩසටහනට සම්බන්ධවෙලා ඉන්නවා. මගේ කණ්ඩායම තමයි දුලීකා අක්කාගේ නායකත්වයෙන් තරග කරන "සුපර් ගැන්ජෙස්ටර්". ඉතින් එම වැඩසටහන්වලටත් පෙර පුහුණුවීම් කටයුතුවලටත් ලැබෙන විවේකය මත සම්බන්ධ වෙලා වැඩ කරනවා. ඉදිරියේදී මගේ අලුත්ම ගීත කිහිපයක් රසික, රසිකාවියන්ට රසවිඳින්න පුළුවන් වෙයි කියන පොරොන්දුව මේ වෙලාවේ මම දෙනවා. හැබැයි මේ කාර්ය බහුලත්වයෙන් මිදිලා මැයි මාසේ අවසන් වෙලා තමයි අලුත්ම නිර්මාණ එළිදක්වන්න බලාපොරොත්තු වෙන්නේ. මම, සඳරුවන් ජයසිංහ, සිරස සුපර් ස්ටාර් රියලටි තරගාවලිය හරහා ක්ෂේත්‍රයට එකතු වුණ දිල්කි වැලිවත්ත වගේම සුලෝචන රාජපක්ෂ කියන අවුරුදු ගීතයක් මේදිනවල රූපවාහිනී නාළිකා කිහිපයකම විකාශය වෙනවා."
