පසුගිය දිනවල බොහෝ දෙනාගේ අවධානය දිනාගත් ටෙලි නාට්‍යය කිහිපයකම රඟපෑ දසුන් නිශාන් ජනප්‍රිය යොවුන් නළුවෙකි. මේ දිනවල විකාශය වන 'සුජාතා' ටෙලි නාට්‍යයේ 'සුර්යා' ලෙසත්, පසුගියදා විකාශය නිමාව දුටු 'ආදර වැස්ස' ටෙලි නාට්‍යයේ 'විශාල්' ලෙසත් බොහෝ රසික පිරිසකගේ ආදරය දිනාගත් දසුන් නිශාන් මේ දිනවල කලා කටයුතු කිහිපයකටම සම්බන්ධ වී සිටින බවට තොරතුරු ලැබේ. දසුන් මේ දිනවල සම්බන්ධ වී සිටින ටෙලි නිර්මාණ අතරින් ඔහුට වෙනස්ම ආකාරයේ චරිතයක්ද රඟපාන්නට අවස්ථාව හිමිව තිබේ. මේ ඒ පිළිබඳව දසුන් 'සාරවිට' අපිට පැවසු අයුරුයි.

"දිලුක ගුණතිලක විසින් අධ්‍යක්ෂණය කරන 'No Were' ටෙලි නාට්‍යයේ තමයි මේ දවස්වල වල වැඩ කරන්නේ. මෙහි මා හසංග කියන චරිතය නිරූපණය කරනවා. චරිතය හැටියට නම් මේක මම මෙතෙක් රඟපෑ චරිත අතරින් වෙනස්ම එකක්. නිතරම කෙන්ති යන කුකුල් කෙන්තිකාරයෙක් විදිහට තමයි මම රඟපාන්නේ. මීට කළින් මේ විදිහේම 'දේදුනු' ටෙලි නාට්‍යයේ දුෂ්ඨ චරිතයක් කළා. නමුත්, ඊට ටිකක් වෙනස් චරිතයක් තමයි හසංග කියන්නේ. 'No Were' ටෙලි නාට්‍යයට අමතරව තවත් ටෙලි නාට්‍යය කිහිපයකම වැඩ කරනවා. ඊට අමතරව ප්‍රියන්ත කොළඹගේගෙ අලුත් චිත්‍රපටයකත් සම්බන්ධ වෙලා ඉන්නවා. මේ කලා කටයුතු එක්ක පසුගිය දිනවල මම මියුසික් විඩියෝ කිහිපයකත් රඟපෑවා. ඒවාති ඉදිරියේදී විකාශය වෙන්න නියමිත වෙලා තියෙනවා. තවමත් මා අන්තිමට රඟපෑ 'සුජාතා' ටෙලි නාට්‍යයේ 'සුර්යා' චරිතයටත්, 'ආදර වැස්ස' ටෙලි නාට්‍යයේ 'විශාල්' චරිතයටත් හොඳ රසික ප්‍රතිචාර ලැබෙනවා.

බුද්ධික සේනාධීර