ඉන්දීය රුපියල් කෝටි 100කට වඩා වැඩි ආදායමක් උපයා ගැනීමට සමත් වූ "බාගි" චිත්‍රපටයේ දෙවැන්නද නිර්මාණය කරන්නට මේ වන විට සැලසුම් කරමින් සිටින බව "ද ටයිම්ස් ඔෆ් ඉන්දියන්" වෙබ් අඩවිය සඳහන් කොට සිටියි. පළමු "බාගි" චිත්‍රපටයේ රඟපෑ ශ්‍රද්ධා කපූර් වෙනුවට "බාගි" දෙවැන්නේ ප්‍රධාන නිළි චරිතයට සුරූපී ජැකලින් ෆර්නැන්ඩෙස් තෝරාගෙන ඇති බවට මෙම වෙබ් අඩවිය වැඩිදුරටත් සඳහන් කර සිටියි.
ජැකලින්ට අමතරව ක්‍රිති ෂැනොන්ද මෙහි උපප්‍රධාන චරිතයකට එක්ව තිබෙන අතර, සුපුරුදු පරිදි ප්‍රධාන නළු චරිතය ටයිගර් ෂෙරොෆ් විසින් නිරූපණය කරනු ලබයි. ඉදිරියේදී තිරගතවීමට නියමිත "අ ෆ්ලයින්ග් ජෙට්" චිත්‍රපටයේද ප්‍රධාන චරිත ජැකලින්, ටයිගර් නිරූපණය කරන අතර, මේ වනවිටද එය ඉහළ ආදායමක් උපයාගනු ඇති චිත්‍රපටයක් බවට බොහෝදෙනා මත පළ කොට ඇත. ක්‍රිතිද මීට පෙර ටයිගර් ෂෙරොෆ් සමගින් රංගනයෙන් දායකව සිටි අතර, ඒ ක්‍රිතිගේ මෙන්ම ටයිගර්ගේද මංගල බොලිවුඩ් චිත්‍රපටය වූ "හීරෝපාන්ති" චිත්‍රපටයේය.
