මෙම වසරේ කෑන්ස් සිනමා උලෙළ ඇමරිකානු සුප්‍රකට සිනමා අධ්‍යක්ෂක "වුඩි ඇලන්" ගේ 49 වැනි සිනමා නිර්මාණය වන "Cafe Society" චිත්‍රපටයෙන් ආරම්භ කිරීමට සැලසුම් කර ඇතැයි සංවිධායකයන් පසුගිය අඟහරුවාදා දිනයේදී ප්‍රකාශයට පත්කොට ඇත. කෑන්ස් සිනමා උලෙළ වුඩී ඇලන්ගේ සිනමා නිර්මාණයකින් ආරම්භ වන තෙවැනි අවස්ථාව මෙය වන අතර, මින් පෙර 2002 වර්ෂයේදී "Hollywood Ending" සිනමාපටයෙන් සහ 2011 වර්ෂයේදී "Midnight In Paris" සිනමාපටයෙන්ද ආරම්භ විය. එසේම කෑන්ස් සිනමා උලෙළේ තෙවතාවක් සිනමා උලෙළ ආරම්භ වූ ප්‍රථම සහ එකම අධ්‍යක්ෂකවරයා බවට ඇලන් ඉතිහාසයට එක්වීමද මෙහි සුවිශේෂත්වයකි. 69 වැනි වරට පැවැත්වීමට නියමිත මෙවර කෑන්ස් සිනමා උලෙළ මැයි 11-22 දක්වා පැවැත්වීමට නියමිත බව වාර්තා වෙයි.

අනුෂි දන්තනාරායන