ශ්‍රී ලංකා අග්‍රාමාත්‍ය රනිල් වික්‍රමසිංහ මහතා ප්‍රමුඛ දූත පිරිස අද(14) පෙරවරුවේ චීනයේ චොංජිං නගරයේ ගුයාන් වරාය සහ බහාලූම් පර්යන්තයේ නිරීක්‍ෂණ චාරිකාවක නිරත වූහ.
පැරණි සේද මාවතේ ප්‍රධාන ප්‍රවාහන මාර්ගයක් වූ යැංසි නදිය ආශ්‍රිතව රට අභ්‍යන්තරයේ වරාය සහ බහාලූම් පර්යන්ත ගණනාවක් ඉදිකර ඇති අතර ඒ අතරට එක්වූ නවතම පර්යන්තය ගුයාන් වරාය සහ බහාලූම් පර්යන්තයයි. මෙම පර්යන්තයේ භාණ්ඩ බෑම සහ පැටවීම සඳහා ජැටි 16 ක් ඉදිකර ඇති අතර එක්වර ටොන් 5000 ක භාණ්ඩ හැසිරවිමේ ශක්‍යතාව ද සතුය. යැංසි නදිය ඉවුරේ මීටර් 2800 ක් පුරා විහිදෙන ආකාරයට බහාලූම් පර්යන්තය ඉදිකර ඇති අතර අධිවේගී මාර්ග හා දුම්රිය මාර්ග සම්බන්ධතාව ද ඉදි කෙරෙමින් පවතී.
මෙම බහාලූම් පර්යන්තයේ සම්පූර්ණ ඉදිකිරීම් කටයුතු 2018 වසරේ නිම කිරීමට බලාපොරොත්තු වන අතර ඉන් පසු අභ්‍යන්තර බහාලූම් පර්යන්තයන් අතර මුලික ස්ථානයක් අත්පත් කර ගැනීමේ සහ ජල, මහාමාර්ග, දුම්රිය හා ගුවන් ප්‍රවාහන පද්ධති එකට යා කෙරෙන ජාතික ප්‍රවාහන මධ්‍යස්ථානයක් බවට පත්වීමේ හැකියාව ද සතු වනු ඇතැයි චොංජිං බලධාරීහු අපේක්‍ෂා කරති.
මේ වසරේ ජනවාරියේ දී චීන ජනාධිපති ෂි ජින්පිං මහතා වරාය නිරීක්‍ෂණ චාරිකාවක යෙදීමෙන් අනතුරුව පැවසූයේ “මෙම ව්‍යාපෘතිය පොරොන්දු ඉටු කිරීමේ සහ සැපිරීමේ පරිපූරණත්වයට උදාහරණ ලෙස ගත හැකි” බවය.
ශ්‍රී ලංකාව දකුණු ආසියාවේ වෙළෙද හා නාවුක ක්ෂේත්‍රයේ කේන්ද්‍රස්ථානයක් ලෙස වර්ධනය කිරීමේ ක්‍රියාවලියේ දී ගුයාන් වරාය වැනි අභ්‍යන්තර වරායන් හා සම්බන්ධ වීමේ හැකියාව සහ අවශ්‍යතාව පිළිබඳව ද ශ්‍රී ලාංකීය නියෝජිත පිරිස මෙහිදී අවධානය යොමු කළහ.
