හිරු ටී.වී. නාළිකාවේ විකාශය වූ 'හිරු තනිවෙලා' ටෙලි නාට්‍යයේ 'අංජූ' ලෙස ඔබ හමුවට ආ අන්ජනා එදිරිමාන්න මේ දිනවල කලා කටයුතුවල එතරම් දකින්නට නොලැබෙන නිළියක්. නිළියක මෙන්ම වැඩසටහන් ඉදිරිපත් කරන්නියක ලෙසද කටයුතු කරන අන්ජනා පසුගිය කාලයේ වඩාත්ම ජනප්‍රිය වූයේ ටි.වී. දෙරණ නාළිකාවේ විකාශය වූ 'බෙක්ෆස්ට් ටු ඩිනර්' කියන වැඩසටහන හරහායි.
ඉදිරියේදී කලා කටයුතු කිහිපයකින්ම රසික ඔබ හමුවට පැමිණීමට සූදානමින් සිටින අන්ජනා එදිරිමාන්න 'සාරවිට' වෙත මෙලෙස ගොඩවැදුණාය.
'පසුගිය කාලේ එක දිගට වැඩ කරපු නිසා කෙටි විවේකයක් ගන්න හිතුවා. ඒ හින්දා තමයි මේ දවස්වල මම කලා කටයුතුවල එතරම් දකින්නට නැත්තේ. ඒත්, මේ දිනවල මම රඟපාන ටෙලි නාට්‍යයක් ජාතික රූපවාහිනියේ විකාශය වෙනවා. ඒ සම්පත් ශ්‍රී රෝෂන්ගේ 'සබ්බ සකල මානා' ටෙලි නාට්‍යය.
පසුගිය කාලේ නිළියකට වඩා නිවේදිකාවක් විදිහට තමයි වැඩිපුරම කටයුතු කළේ. දෙරණ නාළිකාවේ විකාශය වන 'බෙක්ෆස්ට් ටු ඩිනර්' කලා තරු සමග කළ වැඩසටහන වගේම එම නාළිකාවේ විකාශය වුණ 'බ්‍රයිඩ්ල් ෂෝ' කියන වැඩසටහන් කළා.
ඊට අමතරව දෙරණ මියුසික් එවෝඩ්ස් සම්මාන උලළෙත් නිවේදන කටයුතු මම සිදු කළා. ඉදිරියට මගේ බලාපොරොත්තුවක් තියෙනවා රංගන ශිල්පිනියකට වඩා නිවේදිකාවක් විදිහට ඉදිරියට යන්න. නමුත්, රඟපෑම අත්හරින්න සූදානමකුත් නැහැ. ලැබෙන පරිදි ඒ කලා නිර්මාණවලටත් දායක වෙනවා.*
බුද්ධික සේනාධීර
