බොලිවුඩයේ සුපිරිතම නිළියන් අතරින් කෙනෙකු වන අනුෂ්කා ෂර්මා සිය පෙම්වතා වන ඉන්දීය ක්‍රිකට් ක්‍රීඩක විරාත් කෝලි පුදුම කිරීමේ සූදානමකින් පසුවන බව 'සන්ටා බන්ටා' වෙබ් අඩවිය සඳහන් කර තිබේ. අනුෂ්කා පවසන ආකාරයට මෙම පුදුම කිරීම ඇය විසින් සිදු කිරීමට බලාපොරොත්තු වන්නේ ජුනි 06 වැනිදා ප්‍රදර්ශනය කිරීමට නියමිතව ඇති අලි අබ්බාස් සෆර්ගේ 'සුල්තාන්' චිත්‍රපටයේ මංගල දර්ශනයේදී බවයි.
නිල නොලත් ආරංචි මාර්ග සඳහන් කර සිටින්නේ, මෙම මංගල දර්ශනයට විරාත් කෝලිට පමණක් නොව ඉන්දීය ක්‍රිකට් කණ්ඩායමේ සිටින සියලුම ක්‍රීඩකයන්ට ඇය මේ සඳහා ආරාධනා කිරීමට සූදානමක් පවතින බවය. එය බොහෝවිට විරාත්ට පුදුමය දනවන අන්දමට ඇය විසින් සිදු කරන්නට ඇය කටයුතු කරමින් සිටින බවත්, විරාත් ලබන මාසයේ පැවැත්වෙන බටහිර ඉන්දීය කොදෙව් සංචාරයට එක්වීමට පෙර මංගල දර්ශනය ඇය විසින් පවත්වන්නට උත්සාහ ගන්නා බවද මෙම වෙබ් අඩවිය වාර්තා කර සිටියි.
අනුෂ්කා 'සුල්තාන්' චිත්‍රපටයේ මල්ලවපොර ක්‍රීඩිකාවක් ලෙස චරිත නිරූපණය කරන අතර, ක්‍රීඩිකාවක් ලෙස ඇය බොලිවුඩ් චිත්‍රපටයක පෙනී සිටින පළමු අවස්ථාවද වීම විශේෂත්වයක්ද වේ.
බුද්ධික සේනාධීර
