නම - දිනෙත් ද සිල්වා
උපන් ගම - මාතර හක්මන
දැන් පදිංචිය - ජාඇල, ඒකල
පාසැල - කොළඹ තර්ස්ටන් විද්‍යාලය
පවුලේ විස්තර
තාත්තා විශ්‍රාමික පොලිස් අධිකාරිවරයෙක් ඩයමන්ද සිල්වා. අම්මා ලලිතා රත්නවීර, මට ඉන්නවා මල්ලිලා දෙන්නෙක් ප්‍රභාත් සම්පත්, උදේන අසංක.
මේ දවස්වල ජිවිතේ කොහොමද?
සී රජ නාට්‍යයේ වැඩ කළා. තව දැවන්ත ටෙලි නාට්‍යක් මේ මාසේ පටන් ගන්නවා ඒකට සුදානම් වෙනවා. තව අගෝස්තු මාසේ අලුත් චිත්‍රපටයක් කරන්න සුදානම් වෙනවා. මේ දවස්වල ඒ චරිතයට අදාළ විදියට ශරීරය හදාගන්නවා
කලාවට අවතීර්ණ වෙන්නේ කොහොමද?
මම නිරෑපණ ශිල්පියෙක් විදියට එන්නේ සහ අදටත් මම නිරෑපණ කටයුතුවලට සම්බන්ධ වෙනවා. ඊට පස්සේ මට හැකිවුණා music video වලට සම්බන්ධ වෙන්න. ඊට පස්සේ තමා රංගනයට මුලින්ම සම්බන්ධ වෙන්නේ ආලෝකෝ උදපාදී කියන චිත්‍රපටය හරහා. එකේ ප්‍රධාන චරිත කිහිපයක් තියෙනවා ඒකේ චරිත එකකට එකක් සම්බන්ධයි. ඒ තමා මගේ මුල්ම රංගනය.
තව මොනවද ඔබ රඟපෑ නිර්මාණ?
ජපානයේ රෑපගත කිරීම් කරපු සුමිත්‍රා රාහුබන්ධ මහත්මියගේ කන්දක් සේමා නවකතාව ඇසුරෙන් කරපු කන්දක් සේමා චිත්‍රපටය. ඒක අධ්‍යක්ෂණය කළේ අශෝක අතාවුද හෙට්ටි මහතා. ඒ වගේම ඉසුරැ මුදලිගේ ගේ පැණි මකුළුවෝ චිත්‍රපටය සහ ඉක්තා චිත්‍රපටයෙත් සාමා කියන චිත්‍රපටයෙත් මම රඟපෑවා.
සිනමාවටද, පුංචි තිරයටද වඩා කැමති?
මගේ එහෙම විශේෂයක් නැහැ. සමාජයට මිනිස්සුන්ට යම් පණිවිඩයක් දෙන්න පුළුවන් හොඳ නිර්මාණයක් නම් මම ඉතා කැමැත්තෙන් කරනවා සිනමාව හෝ වේවා පුංචි තිරය වේවා වෙනසක් නැහැ. නමුත් සිනමාවට මම ගොඩාක් ආදරෙයි.
ඔබ කවදා හරි නළුවෙක් වෙන්න ඕනේ කියලා සිහින දැක්ක කෙනෙක්ද?
මගේ යටි හිතේ තිබ්බා කලාවට පුදුම ආදරයක්. ඒ නිසා වෙන්න ඇති මම කලාවට නොදැනුවත්වම යොමු වුණේ. ඉතින් මටත් හිතෙනවා මගේ හිතේ තිබුණ සිහිනය තමා මේ සැබෑ වෙමින් යන්නේ කියලා.
කලාව නියෝජනය කිරීම ගැන මොකද හිතෙන්නේ?
සත්තකින්ම සතුටු වෙනවා. මොකද මම කලාවට කැමති සොබාදහමට මිනිස්සුන්ට සතුන්ට ආදරය කරන කෙනෙක්. ඒ නිසා උපරිමයෙන්ම සමාජයට දෙයක් දෙන්න පුළුවන් හොඳ නිර්මාණවලට මම දායක වෙනවා.
කරපු හෝ කරන්න කැමති චරිතයක් තියෙනවද?
මම එක චරිතයකට කොටු වෙන්න කැමති නැහැ. මම ආසයි චරිතාංග නළුවෙක් වෙන්න. මට මම ගැන ලොකු විශ්වාසයක් තියෙනවා හැම පරාසයකම චරිත කරන්න පුළුවන් කියලා.
එතකොට ඔබ චරිත තෝරාගන්නේ කොහොමද?
මගේ එකම බලපොරොත්තුව මුදල් පස්සේ නොයෑම, මුදල් අපිට අවශ්‍යයි තමා. එත් එහෙම කියලා ලැබෙන හැම නිර්මාණයක්ම භාරගන්න කැමති නැහැ. මම කරන චරිත ගැන මට හොඳ අවබෝධයක් තියෙනවා. ඉතින් සමාජයට පණිවිඩයක් දිය හැකි මිනිස්සුන්ට මතක තියෙන චරිතයක් කිරීම තමා මගේ අරමුණ.
මෙතෙක් කරපු චරිත අතරේ කැමතිම චරිතයක් තියෙනවාද?
ඇත්තටම ඔව්, මේ දවස්වල මම කරන ජැක්සන් ඇන්තනී මහතාගේ සී රජ කියන නාට්‍යයේ මම "ධාඨ" කියන චරිතය කරන්නේ. මගේ බිසව "විජුලා"ට ඉන්නේ මේනකා පීරිස්. මාව දැවැන්ත තැනකට ගෙනාපු චරිතයක්. මාව තේරැම් අරගෙන මට ගැළපෙන චරිතයක් ලබාදුන්න ජැක්සන් ඇන්තනී මහතාව මේ මොහොතේ ආදරයෙන් සිහිපත් කරන්න ඕනේ. එතුමා මගෙන් උපරිම ප්‍රයෝජනය නෙලා ගත්තා. ඉතින් ඉතාමත් හොඳ ප්‍රතිචාර ලැබෙනවා. මම කැමතියි ඒ චරිතයට.
ආදරය ගැන කතා කළොත් පෙම්වතියක් ඉන්නවද?
පෙම්වතියක් නැත.
ඇත්තටමද කියන්නේ?
අනේ ඔව්, ඇත්තටම තමා කියන්නේ. මම මගෙන්ම අහලා බලද්දී මට දැනෙන දේ තමා මම මේ ගත කරන කාලය කැපකරන්නේ කලාව වෙනුවෙන්. ඒ වැඩවලට ආදරය කරන නිසා ආදරවන්තියකට ආදරය කරන්න ඒ වෙනුවෙන් වෙන්කරන්න කාලයක් හොයාගන්න අමාරැවක් තියෙනවා. නමුත් එහෙම කෙනෙක් ජිවිතයට හිටිය නම් කියලත් තදින්ම දැනෙනවා.
අනාගත බලාපොරොත්තු මොනවද?
දැනට මගේ බලාපොරොත්තුව හොඳ නිර්මාණවලට උපරිමයෙන් දායකත්වය ලබාදීම. කවදාහරි මගේ නිර්මාණයක් තුළින් මගේ පුංචි රටට මට පුළුවන් ආකාරයෙන් ආඩම්බරයක් ගෙන දෙන්න. කවදාහරි ලෝකයට යා හැකි රට නියෝජනය කළ හැකි නිර්මාණයක් කිරීමට බොහොම කැමැත්තෙන් ඉන්නවා.
අනූ
