මාවනැල්ල - අරණායක, හත්ගම්පළ එළඟපිටිය කන්ද අද (17) පස්වරුවේ නාය යාමට ලක්ව ඇතැයි ආපදා කළමනාකරණ මධ්‍යස්ථානය කියයි.
එම ප්‍රදේශයේ නිවාස 120ක් පමණ ඇතැයි වාර්තාවේ.
පොලිසිය, හමුදාව හා ආපදා කළමනාකරණ නිලධාරීන් එම ප්‍රදේශයේ ආපදාවට ලක්වූවන් මුදාගැනීමේ මෙහෙයුම් තවදුරටත් ක්‍රියාත්මක කරන බව එහි ගොස් සිටින පාර්ලිමේන්තු මන්ත්‍රී කණක හේරත් මහතා පවසයි.
අද සවස් කාලයේ කන්දේ ගල් පෙරළීම් හා නාය යෑම් සිදු වෙන බැවින් එළඟපිටිය ජනපදයේ ඇතැම් පිරිස් සහන සේවා සොයා පැමිණ ඇතැයි අරණායක ප්‍රාදේශීය ලේකම් කාර්යාලය පවසයි.
මෙ වන විටත් වර්ෂාව පතිත වන අතර ගල් පෙරළීම් හා නාය යෑම් දිගටම සිදුවිය හැකි බවට ආපදා කළමනාකරණ නිලධාරීහු අනතුරු අඟවා ඇත.
නිවාස රැසක්ද මේ නිසා කැඩී බිඳී ගොස් ඇති බවද ප්‍රදේශවාසීහු කියති.
එළඟපිටිය කඳු මුදුනේ පිහිටි සාමසර විහාරස්ථානය පළමුව නාය යෑමට ලක් වු බවද කියති. මේ වන විට පවුල් 200ක් පමණ දිප්පිටිය රාජගිරි මහා විද්‍යාලය, හත්ගම්පොළ පන්සල සහ අවට පාසලක අනාථ කඳවුරුවල රඳවා සිටින බවද ආපදා කළමනාකරණ නිලධාරීහු කියති.
