(සුජිත් හේවාජුලිගේ, වසන්ත චන්ද්‍රපාල සහ ප්‍රියනාත් චන්ද්‍රපාල)
අම්පාර අරුගම්බේ සංචාරක ප්‍රදේශයට නැවත දැනුම් දෙනතුරු යෑමෙන් වළකින ලෙස සිය තානාපති කාර්යාල නිලධාරීන්ට සහ ඇමරිකානු පුර වැසියන්ට කොළඹ ඇමරිකානු තානාපති කාර්යාලය අනතුරු අඟවා ඇත.
එම තානාපති කාර්යාලය පවසන්නේ අරුගම්බේ ප්‍රදේශයේ සංචාරක ස්ථානවලට ප්‍රහාරයක් එල්ල විය හැකි බවට විශ්වාස කටයුතු තොරතුරු කිහිපයක් ලැබී ඇති බවයි.
මේ සම්බන්ධයෙන් අදහස් දක්වන පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව මහතා පවසන්නේ එවැනි තොරතුරක් ලැබීමෙන් පසු ප්‍රදේශයේ ආරක්ෂක විධිවිධාන තරකර ඇති බවයි.
මෙම ප්‍රදේශයට විනෝදය සඳහා ඊශ්‍රායල ජාතිකයන් වැඩි වශයෙන් පැමිණෙන හෙයින් එම ජාතිකයන් වෙනුවෙන් ප්‍රදේශයේ ගොඩනැගිල්ලක්ද ස්ථාපනය කර ඇති බව පොලිස් මාධ්‍ය ප්‍රකාශකවරයා කීවේය.
එම ජාතිකයන්ට අනතුරක් විය හැකි බවට යම් යම් තොරතුරු ලැබී තිබූ බවද ඔහු කීවේය.
(ඡායාරූප: වසන්ත චන්ද්‍රපාල)
