නඩුවලට සම්බන්ධ අලි ඇතුන් ද නොමැතිව පෙරහර කිරීමට නොහැකි හෙයින් ඔවුන් මුදා හැරීමට පාලකයින්ට සිත් පහළවේවායි කියමින් පිරිසක් අද (8) සීනිගම දේවාලයේදී පොල් ගැසූහ.
සිංහල රාවයේ මහලේකම් හා හීලෑ අලි ඇතුන් සුරැකීමේ සංගමයේ සභාපති මාගල්කන්දේ සුදන්ත හිමියෝ ද ඇත්ගොව්වෝ 50-60ක් පමණ ද ඊට එක්වූහ.
අලි හිඟතාවය නිසා කතරගම දේවාල පෙරහර පමණක් නොව අනික් දේවාලවල නිලමේවරුන්ද පෙරහැර නොකිරිමට එකඟතාවය පළ කර ඇති බවත් දළඳා මාලිගාවට ඇත් පංතියක් ඇති මුත් දේවාල සදහා ඇත් පංතියක් නොමැති බවත් එසේ අලින් නොමැති වුවහොත් දළඳා පෙරහරේ ගමන් කරන දේවාල පෙරහරවල් පවත්වන්නට හැකියාවක් නොමැති බවත් සමස්ත ලංකා බස්නායක නිලමේවරුන්ගේ සංගමයේ සභාපති හා මහනුවර ශ්‍රි කතරගම දේවාලයේ බස්නායක නිලමේ ගැමුණු තිලක බණ්ඩාර වලිසුන්දර මහතා පවසයි.
ප්‍රශ්නය _ වනජීවී අමාත්‍යවරයා කිවුව නේද අලින් 147 ක් පමණ ඉන්නවා. පෙරහරට අලින් ඊට අඩුව සහභාගි වෙන්නෙ කියලා.
පිළිතුර _ එයාට ඉන්නව ඇති අලි 147 ක් වනජීවී අමාත්‍යවරයා කොහෙද අලි ගැන දන්නේ. එයා වයඹ මහ ඇමැති කාලෙ වයඹ අලි අල්ලන්නත් ගියා.අලි 147 ඉන්නවනම් සංඛ්‍යා ලේඛන ඉදිරිපත් කරන්න කියන්න ඇමැතිවරයාට. දැන් අවුරුදු 3 කින් වනඡිවී දෙපාර්තුමේන්තුවෙන් අලි ලියාපදිංචි කරල නෑ. එතකොට ඇමැති කොහොමද දන්නෙ අලි 147 ක් ඉන්නවා කියලා
ප්‍රශ්නය - වනජීවී භාරයට ගත්ත අලි නැවත අයිතිකරුවන් හැටියට පෙනී ඉන්න අයට දෙන්න කියලද කියන්නේ?
පිළිතුර - අපි රජයෙන් ඉල්ලා සිටින්නෙ කොහෙන් හෝ පෙරහර කිරිමට අලි දෙන්න කියලා. යම් ක්‍රමවේදයකට කොන්දේසි මත මහනුවර ශ්‍රි දලදා මාලිගා පෙරහර හා සතර මහා දේවාල හා විහාරගම් දේවාලගම් පනතෙන් පාලනය වන සියලුම දේවාලවල් වලට සහභාගි කරවන දැඩි කොන්දේසිය මත අලින් දෙන්න ඕන. පෙරහරට ආව කියල බස්නායක නිලමෙවරු සහතික කරන්න ඕන.
ඡායාරූප - දේමුණි සම්පත්
ඡායාරූප - චමිල් රූපසිංහ
