දකුණු පුරවරයේ දික්වැල්ල ප්රදේශයෙ පදිංචි උපේක්ෂා වත්තුහේවගේ මේ වනවිට ටෙලිනාට්‍ය රංගන ශිල්පිනියක ලෙස කලා ක්‍ෂේත්‍රයට පිවිසි සිටින්නීය. කලා ලෝකයේ දිගු ගමනක් යාමට අපේක්ෂාවෙන් සිටින ඇය, නිරූපණ ශිල්පිනියක ලෙසද කටයුතු කර ඇත. ඉදිරි කාලය තුළ ගීත රූප රචනා තුළින් හා චිත්‍රපටවල රඟපෑමෙන් තම දායකත්වය ලබා දීමට බලාපොරොත්තුව සිටින්නීය. මේ ඇය පිළිබඳව තැබූ සටහනකි.
ඔබ පිළිබඳව හැඳින්වීමක් කළොත්
මම දකුණු පුරවරයේ දික්වැල්ල වත්තේගම ප්රදේශයෙ තමයි දැනට පදිංචි වෙලා ඉන්නේ. මගේ පවුලේ අම්මයි තාත්තයි අයියලා දෙන්නයි මමයි තමයි ඉන්නේ. මම උසස් පෙළ දක්වා ඉගෙන ගත්තේ දික්වැල්ල විජිත මහා විදුහලෙන්.
ඔබ රංගනය පිවිසීම සම්බන්ධයෙන් සඳහන් කළොත්?
ඔව්, මම පාසල් යන කාලේ ඉඳලම රඟපෑම් කටයුතුවලට සහභාගී වෙලා තියෙනවා. මම ගොඩක් ආසයි ඒ පැත්තට. දැන් මේ වෙනකොට හිරු ටී.වී නාළිකාවේ “ආටක නාටක” වැඩසටහනට සම්බන්ධවෙලා රඟපෑමෙන් දායක වෙනවා. ඊට අමතරව එම නාළිකාවේම “සයිබර් ක්‍රයිම්” වැඩසටහනටත් සම්බන්ධ වෙලා තියෙනවා. ඉදිරි කාලයේදී මගේ ඒ රඟපෑම් ප්‍රේක්ෂකයන්ට දැකගැනීමට හැකිවේවි.
ඔබ මේ ක්‍ෂේත්‍රයට පැමිණීම පිළිබඳව පවුලේ කැමැත්ත?
මගේ අම්මයි තාත්තයි දෙන්නම හරිම කැමතියි. ගොඩක් මගේ මේ වැඩවලට ඒ අය උදව් කරනවා. මට ගැළපෙන හොඳ චරිත ලැබෙනවානම් තෝරාගෙන රඟපාන්න කියලයි ඒ අය කියන්නේ. අයියලා දෙන්නත් ඒ වගේම තමයි. නිතරම මාව උනන්දු කරනවා. මගේ එක අයියා කෙනෙක්ගේ මාර්ගයෙන් තමා සුරේෂ් ද අල්විස් කියන අධක්ෂකවරයා හඳුනාගෙන මට මේ වනවිට ටෙලි නාට්‍ය කීපයක රඟපාන්න අවස්ථාව උදා වුණේ.
ඔබගේ ඉදිරි බලාපොරොත්තු
මම ඉදිරියේදී බලාපොරොත්තු වෙනවා ටෙලිනාට්‍යවල රඟපෑම් වගේම ගීත රචනාවලට අනුකූලව රූප රාමුවල පෙනී සිටීමටත් චිත්‍රපටවල රඟපෑමටත්. මේ වෙනකොටත් චිත්‍රපටයක රඟපෑම සඳහා ආරාධනාවක්‍ ලැබිලා තියෙනවා. ඒ වගේම මගේ ලොකු ආශාවක් තියෙනවා විකට චරිතවලට රඟපාන්න. ඊට අමතරව මම තවදුරටත් මේ ක්‍ෂේත්‍රය පිළිබඳව හොඳට හදාරලා කලා කටයුතුවල දිගටම නිරත වෙන්න තමයි අදහස තියෙන්නේ.
ඔබට විශේෂයෙන් මතක් කළ යුතු අය සිටිනම්
මම මේ වෙලාවෙ විශේෂයෙන්ම මතක් කරන්න ඕන මගේ අම්මයි තාත්තයි ඇතුළු මගේ පවුලේ අනිත් සියලුම දෙනා. ඒ අයගේ සහයෝගය නිසා තමයි මට අද වෙනකොට මේ තත්ත්වයට එන්න හැකිවෙලා තියෙන්නේ. ඒ වගේම සුරේෂ් ද අල්විස් කියන අධක්ෂකතුමා, සමින්ද්‍ර ධම්මික සහ සමීර යන අයත් මගේ මේ වැඩකටයුතුවලට ලොකු සහයෝගයක් ලබාදීලා තියෙනවා.
රෝහණ ආරියරත්න - හම්බන්තොට
