සුළු පැමිණිලි විභාග කිරීමේ සිට බලපත් රහිතව වැඩි ගොඩ දැමීම දක්වා නීතිය ක්‍රියාත්මක නොකර සිටීමට මුදල් ලබා ගන්නේයැයි නැගෙනහිර පළාතේ පොලිස් ස්ථානයක ස්ථානාධිපතිවරයකුට එරෙහිව ලද පැමිණිල්ලක් සම්බන්ධයෙන් විමර්ශන ආරම්භ කර ඇතැයි පොලිස් ආරංචි කියයි.
බලපත්‍ර හරිතව දැව ගෙන යෑමට රුපියල් 5000ක් ද, බලපත්‍ර රහිතව වැලි ප්‍රවාහනයට රුපියල් 7000ක් ද, සුළු ආරවුල් විසඳීමට රුපියල් 5000ක් ද, පැමිණිලි සටහන් නොකර විභාග කිරීමට රුපියල් 5000ක් ද, කිරි එළදෙනකු ප්‍රවහනයට රුපියල් 2000ක් ද, මීහරකකු ප්‍රවාහනයට රුපියල් 5000ක් ද මේ ස්ථානාධිපතිවරයා අය කරන බවට පැමිණිලි ලැබී ඇතැයි පොලිසිය පවසයි.
එම පැමිණිලිවල සත්‍ය අසත්‍යතාවය සොයා බැලීම සඳහා නැගෙනහිර පළාත භාර ජ්‍යෙෂ්ඨ නියෝජ්‍ය පොලිස්පති ලලිත් ඒ ජයසිංහ මහතාගේ උපදෙස් පරිදි මඩකලපුව දිසා භාර නියෝජ්‍ය පොලිස්පතිගේ අධීක්ෂණයෙන් එම විමර්ශන ක්‍රියාත්මක වෙයි.
