රාජගිරියේදී පාඨලී චම්පික රණවක ඇමැතිගේ රියේ හැපී යතුරුපැදිකරුවකු අනතුරට පත්වීමේ සිද්ධිය ගැන පරීක්ෂණ රහස් පොලිසියට දෙන්නේද නැද්ද යන්න ගැන ලබන අප්‍රේල් 27 වැනිදා තීරණය කරන බව රථවාහන අධිකරණයේ මහේස්ත්‍රාත් චන්දන කලංසූරිය මහතා ප්‍රකාශ කළේය.
අනතුර සිදුවූ දිනයේ චම්පික ඇමැති කෙතරම් දුරකථන භාවිත කළේද කෙතරම් ඇමතුම් සංඛ්‍යාවක් ගත්තේද යන්න ඔහුගේ ජාතික හැඳුනුම්පත ආශ්‍රයෙන් පරීක්ෂණයක් පවත්වන ලෙස මහේස්ත්‍රාත් පොලිසියට නියෝග කළේය.
සිද්ධිය ඇසින් දුටු සාක්කිකරුවන් වන ගයාන් විදුර, එම්.එස්.සිද්ධික් යන අයගේ දුරකථන වාර්තා ද පරීක්ෂාකරන ලෙස විත්තියේ නීතිඥවරු ඉල්ලා සිටියහ. ඒ අනුව ඔවුන්ගේ පෙබරවාරි හා මාර්තු මාසවල දුරකථන වාර්තා පරීක්ෂා කිරීමට ද අධිකරණය අවසර දුන්නේය.
සීසීටීවී කැමරා විස්තර කඩිනමින් ගොනු කරන ලෙස ද මහේස්ත්‍රාත් පොලිසියට දැන්වීය. අගතියට පත් පාර්ශවයේ නීතිඥවරු තවත් සීසීටීවී කැමරා 24ක තොරතුරු අධිකරණයට සැපයූ අතර ඒ ගැනද විමර්ශන කරන ලෙස මහේස්ත්‍රාත් නියෝග කළේය.
