ඇඹිලිපිටිය නව නගරයේ තිබූ සාදයකදී පොලීසිය හා ඇතිවූ ගැටුමකින් පසු මියගිය සුමිත් ප‍්‍රසන්න ජයවර්ධනගේ සිරුර සම්බන්‍ධයෙන් පැවැත්වූ දෙවැනි පශ්චාත් මරණ පරීක්ෂණ වාර්තාව අධිකරණයට ලැබී ඇති බව පැවසූ ඇඹිලිපිටිය අතිරේක මහේස්ත‍්‍රාත් ප‍්‍රසන්න ප‍්‍රනාන්‍දු මහතා එම සිද්ධිය සම්බන්‍ධයෙන් පවත්වන විමර්ශන මැයි 18 වැනි දිනට අවසන් කරන ලෙස අපරාධ පරික්‍ෂණ දෙපාර්තමේන්තුවට අද (4) නියම කළේය.
ඇඹිලිපිටිය හිටපු සහකාර පොලිස් අධිකාරී චමින්ද ධර්මරත්න කුරුවිට බන්‍ධනාගරයේ සිට බන්‍ධනාගාර බස් රථයකින් ඔහු අධිකරණය වෙත ගෙන එනු ලැබීය. ඔහු ලබන 18 වැනිදා තෙක් යළි රිමාන්ඩ් කැරිණි.
ජනවාරි 4 වැනිදා ඇඹිලිපිටිය නව නගරයේ මෙන්ඩිස් ගොඩනැගිල්ලේ යාබද නිවසේ දැරියක වැඩිවිය පැමිණීමේ උත්සවයේ දී පොලිසිය හා සාදයට පැමිණි පිරිස් අතර ඇතිවු ගැටුමකින් පසු සුමිත් ප‍්‍රසන්න ජයවර්ධන (29)මිය ගියේය.
ඉදිරි විමර්ශන සඳහා නීතිපති උපදෙස් ඉල්ලා ඇති බව රහස් පොලිසිය කීවේය.
අතිරේක මහේස්ත‍්‍රාත්වරයා පැවසුවේ මෙම විමර්ශන කටයුතු සඳහා නීතිපතිගේ උපදෙස් අවශ්‍ය නොවන බවයි.
