අවකාෆ් සහ ඉස්ලාම් කටයුතු අමාත්‍යාංශය විසින් ඉටිකාෆ් චාරිත්‍රය සඳහා රට පුරා මුස්ලිම් දේවස්ථාන 136 ක් නම් කර තිබේ.
ඉටිකාෆ් යනු ශුද්ධ වූ රාමදාන් මාසයේ අවසන් දින 10 තුළ ඉබාදාහ් (අල්ලා දෙවියන් වැඳීම) වෙනුවෙන් කැප කිරීමේ ඉස්ලාම් චාරිත්‍රයකි. මෙම දින 10 තුළදී ඉටිකාෆ් චාරිත්‍රයේ යෙදෙන බැතිමතුන් සියලු ලෞකික කටයුතුවලින් වැළැකී ආගමික වතාවත්වල යෙදෙයි.
ඉටිකාෆ් චාරිත්‍රයේ යෙදිය හැක්කේ නම් කරන ලද මුස්ලිම් දේවස්ථාන තුළදී පමණක් බව අමාත්‍යාංශය නිකුත් කළ නිවේදනයේ දැක්වේ. ඉටිකාෆ් චාරිත්‍රයේ යෙදිය හැකි බැතිමතුන් (මුටාකිෆ්) වයස අවුරුදු 15 ට නොඅඩු විය යුතු අතර වයස අවුරුදු 15 ට අඩු බැතිමතුන් සිය භාරකරුවන් සමග රැඳී සිටිය යුතුය. වයස අවුරුදු 8 ට අඩු දරුවන්ට ඉටිකාෆ් චාරිත්‍රය සිදුකළ නොහැකිය.
ඉටිකාෆ් චාරිත්‍රයේ යෙදීමට බලාපොරොත්තු වන්නන් සිය පෞද්ගලික පිරිසිදුකම ගැන අවධානය යොමු කළ යුතු අතර මුස්ලිම් දේවස්ථානයේ දේපොළ ආරක්ෂා කළ යුතුය. එමෙන්ම අනෙක් බැතිමතුන්ට බාධා නොකළ යුතු බව අමාත්‍යාංශය පවසයි.
දේවස්ථානයේ බිත්ති මත හෝ කණු මත ඇඳුම් එල්ලා තැබීමෙන් වළකින ලෙසත්, නිදාගැනීම සහ ආහාර අනුභවය ඒ සඳහා වෙන්කොට ඇති ස්ථානවල පමණක් සිදුකරන ලෙසටත් අමාත්‍යාංශය ඉල්ලීමක් කර තිබේ.
