ඉරානයෙන් අතීතයේ දී ශ්‍රී ලංකාව ලබාගත් බොරතෙල්වලට නොගෙවූ ඇමරිකා ඩොලර් කෝටි 25.6ක් (රුපියල් කෝටි 3700ක්) ගෙවීමට ශ්‍රී ලංකාව එකඟ වෙයි.
ඛනිජ තෙල් අමාත්‍ය චන්දිම වීරක්කොඩි මහතා සහ ඉරාන නිලධරයන් අතර ටෙහෙරාන් නුවර දී පැවැත්වූ සාකච්ඡාවල දී මෙම ණය ගෙවීමට එකඟත්වය පළ කළේය.
නීතිපති දෙපාර්තමේන්තුවේ නිලධරයෙක් ද ශ්‍රී ලංකා නියෝජිත පිරිසට එක්විය. නොගෙවූ මුදල් ආපසු ගෙවීමේ ක්‍රම ගැන ඔහු ඉරාන නිලධරයන් සමග සාකච්ඡා කළේය. එක් යෝජනාවක් වූයේ ශ්‍රී ලංකාවෙන් ඉරානයට සපයන තේවලට ලැබෙන මුදල්වලින් එම ණය ගෙවිය යුතු බවයි.
ඉරාන බොරතෙල් පිරිපහදු කිරීම සඳහා සපුගස්කන්ද තෙල් පිරිපහදුව ඉදිකර ඇති හෙයින් ඉරාන සැහැල්ලු බොරතෙල් ඉරානයෙන් මිලට ගැනීමට ශ්‍රී ලංකාව යළිත් සැරසෙයි. ඉරාන තෙල් සම්බන්ධයෙන් ඇමරිකාව පනවා තිබූ අන්තර්ජාතික තහංචිය ඉවත් කිරීමත් සමග ඇමැති වීරක්කොඩි ඉරානයට ගොස් මෙම වැඩපිළිවෙළ ගැන සාර්ථක ලෙස සාකච්ඡා නිම කළේය.
