(විමුක්ති එස් රුද්‍රිගු)
උතුරු කොරියාව යුක්රේනය සමග යුද වැදීමට සිය හමුදා රුසියාවට යවා ඇති බවට දකුණු කොරියානු ජාතික බුද්ධි අංශ සේවාව නිකුත් කළ වාර්තාව තහවුරු කරමින් නැගෙනහිර රුසියාවේ හමුදා පුහුණු කඳවුරක දී උතුරු කොරියානු සොල්දාදුවන් නිල ඇඳුම් සහ ආම්පන්න බාරගනු ලබන වීඩියෝවක් යුක්රේන බුද්ධි අංශ විසින් සී.එන්.එන් පුවත් සේවය ලබා දී ඇත.
වීඩියෝ පටයේ සිටින සොල්දාදුවන් කොරියානු භාෂාව කතා කරන බවට තහවුරු වී ඇතත් ඔවුන් කතා කරන්නේ කුමක් පැහැදිලිතාවයක් නොමැති බව සී.එන්.එන් පුවත් සේවය වාර්තා කළේය. රුසියාවට පැමිණි අවස්ථාවේ කොරියානු සොල්දාදුවන් ප්‍රශ්නාවලියක් ඉදිරිපත් කර ඇති බවත් එහි ඔවුන් පළඳින තොප්පි, හිස් ආවරණ, නිල ඇඳුම් සහ සපත්තු වල ප්‍රමාණයන් පිළිබඳ විස්තර අසා ඇති බවත් එම පුවත් සේවය ප්‍රකාශ කළේය.
සමාජ මාධ්‍යයේ තවත් වීඩියෝවක් සංසරණය වන බවත් එම වීඩියෝවේ උතුරු කොරියානු සොල්දාදුවන් රුසියානු චීන දේශසීමාව ආසන්නයේ තිබෙන සර්ගිවුකා පුහුණු කඳවුරට පැමිණෙන අයුරු දැක්වෙන බවත් සී.එන්.එන් පුවත් සේවය වාර්තා කළේය. එසේම උතුරු කොරියාව සිය සොල්දාදුවන් රුසියාවට යවා ඇති බවට බුද්ධි තොරතුරු ලැබී ඇතැයි යුක්රේන ජනාධිපති ව්ලොදිමීර් සෙලෙන්ස්කි ප්‍රකාශ කර තිබෙන බවද එම පුවත් සේවය පැවැසුවේය.
මේ සම්බන්ධව අදහස් දක්වමින් නේටෝ සංවිධානය, ප්‍රංශය සහ ඇමෙරිකාව ප්‍රකාශ කර ඇත්තේ මෙම වාර්තා සහ චෝදනා තහවුරු කර ගැනීමට ප්‍රමාණවත් සාක්ෂි නොමැති බවත් එම තොරතුරු සත්‍ය නම් මෙය යුක්රේනය සහ රුසියාව අතර ඇති අර්බුදය නව අදියරකට ගෙන යාමක් බවත් ය.
