උතුරේ හින්දු බැතිමතුන් ගේ සම්ප්‍රදායික කතරගම පාද යාත්‍රාව කුමන ජාතික වනෝද්‍යානය මැදින් අද (27) ඇරැඹිණි.
1500ක් පමණ වන්දනාකරුවෝ මේ ගමනට එක්වී සිටිති. පොතුවිල මූදු මහා විහාරාධිපති වරකාපොළ ඉන්දසිරි හිමියන්ගේ අනුග්‍රහයෙන් පැවැත්වූ කිරිබත් දන්සලකින් උදේ ආහාර ලබාගත් පිරිස කුමන හා යාල වනෝද්‍යාන මැදින් ගමන් කර ජූලි 5 වැනිදා කතරගම පුදබිමට ළඟාවීමට නියමිතය.
875 දෙනකු අද උදේ 6 වනවිට කුමන වනෝද්‍යානයෙන් පාද යාත්‍රාවට එක්වූ බව කුමන වනෝද්‍යාන භාරකරු සිසිර කුමාර රත්නායක මහතා කියයි.
කතරගම බලා එන වන්දනාකරුවන් වෙනුවෙන් ඔකඳ සිට වන මැද මහා මාර්ගය අද විවෘත කළ බව වනජීවී නිලධරයෝ කියති. වන්දනාකරුවන් නවාතැන් ගන්නා පොත්තන ඉපැරණි ළිං පිරිසිදු කළ බව කතරගම සෞඛ්‍ය වෛද්‍ය නිලධාරී කාර්යාලය කියයි. ඒ සඳහා කටගමුව යුද හමුදා කඳවුර සහාය දුන්නේය. ශ්‍රී ලංකා නාවික හමුදාව ද වන්දනාකරුවන්ගේ ඕනෑ එපාකම් සපුරයි.
ඡායාරූප - යූ.විජේසිංහ
