දිවයිනේ ප්‍රදේශ රැසක දහවල් උපරිම උෂ්ණත්වය මේ දිනවල සාමාන්‍ය අගයට වඩා සෙල්සියස් අංශක දෙකකින් තුනකින් පමණ ඉහළ ගොස් ඇති නිසා හිරු එළියට විවෘතව අධික ලෙස වෙහෙසවීමෙන් වළකින ලෙස කාලගුණ විද්‍යා දෙපාර්තමේන්තුව ජනතාවට දැනුම්දීමක් කරයි.
ශරීරය වෙහෙසට පත්වන විට ශරීර උෂ්ණත්වය වැඩි වුවත් පවතින කාලගුණ තත්ත්වය යටතේ එම උෂ්ණත්වය අඩුකරගැනීමේ හැකියාවක් ශරීරයට නොමැති බැවින් හිරු එළියේ වෙහෙසීම අහිතකර බව කාලගුණ විද්‍යා දෙපාර්තමේන්තුවේ අනාවැකිකරණ හා කෘෂි කාලගුණික අංශයේ අධ්‍යක්ෂ කේ.එච්.එම්.එස් ප්‍රේමලාල් මහතා පැවසීය.
දැනට පවතින දැඩි වියළි හා උණුසුම් කාලගුණ තත්ත්වය මැයි මාසයේ අවසානය දක්වාම පවතිනු ඇතැයි ද කාලගුණ විද්‍යා දෙපාර්තමේන්තුව පවසයි.
අප්‍රේල් මාසයේ අන්තර් මෝසම සක්‍රීය වී වැසි ඇතිවුවත් මැයි මාසයේ නිරිත දිග මෝසම සක්‍රීය වන තුරු පරිසර උෂ්ණත්වය සම්බන්ධයෙන් විශාල සහනයක් බලාපොරොත්තු විය නොහැකි බව ද කේ. එච්. එම්. එස් ප්‍රේමලාල් මහතා සඳහන් කළේය.
එසේ වුවත්අප්‍රේල් මස හතර වැනිදා සිට 14 වැනිදා දක්වා ශ්‍රී ලංකාවට ඉහළින් හිරු මුදුන්වන බැවින් එම දිනවලදීද පරිසරයේ උණුසුම තරමක් ඉහළ යනු ඇතැයි කාලගුණ විද්‍යා දෙපාර්තමේන්තුවේ ප්‍රකාශකයෙක් පැවසීය.
අන්තර් මෝසම් වැසි නොලැබීම, සුළං ධාරාවල වෙනස්කම් නිසා පහළ වායුගෝලයේ පමණක් ජලවාෂ්ප වැඩිවීම ආදිය පරිසර උෂ්ණත්වය ඉහළයාමට හේතුව බව කාලගුණ විද්‍යා දෙපාර්තමේන්තුව පවසයි.
