පවතින අධික වර්ෂාව හේතුවෙන් කඩුවෙල ප්‍රදේශය ජලයෙන් යටවිය. ජල ගැල්ම කඩුවෙල මහමෙව්නාව භාවනා අසපුවටද බලපෑම් ඇති කළේය. මහමෙව්නාව භාවනා අසපුවේ ශ්‍රද්ධා මාධ්‍ය ජාලය ක්‍රියාත්මක වන කඩුවෙල අසපුවේ එම කටයුතු කරගැනීමට නොහැකිව අඩාල වී ඇත. ශ්‍රද්ධා රූපවාහිනී නාළිකාවේ විකාශන කටයුතු තාවකාලිකව නවතා ඇත.
එහි වැඩවසන හිමිවරුන් අසපුවේ ඉහළ මහලේ පමණක් රැඳී සිටින අතර අසපු භූමිය සම්පූර්ණයෙන්ම ජලයෙන් යටවී ඇත. නමුත් මහමෙව්නාව භාවනා අසපුවේ මූලිකත්වයෙන් රටපුරා අවතැන්වූ ජනතාවට සහන සැලසීමේ කටයුතු ද ආරම්භ කර ඇති අතර ඔබට හැකි අයුරින් ඒ සඳහා දායකත්වය ලබාදීමට 071 232 88 26 අංකය අමතන ලෙස මහමෙව්නා අසපුවේ ලේඛකාධිකාරී අළුදෙණියේ සුබෝධි හිමියෝ ඉල්ලා සිටිති.
මේ අතර කඩුවෙල මෙන්ම කොළොන්නාව, මුල්ලේරියාව, අංගොඩ නගරය, වැල්ලම්පිටිය ප්‍රදේශයද ජලයෙන් යටවීම හේතුවෙන් එම ප්‍රදේශවල වැසියෝ දැඩි අසීරුතාවයට පත්ව ඇතැයි කියති. පාරවල් ජලයෙන් යටවීම හේතුවෙන් ගමනාගමන කටයුතු ද ඇන හිට ඇත.
ඡායාරූප - ෆේස්බුක් අනුග්‍රහයෙනි
ඡායාරූප - ශාන්ත රත්නායක
