අල් වාබ්, දුහායිල්, සල්වා පාර, අල් කීෂා සහ අල් මිර්කාබායි යන ප්‍රදේශවල පවත්වාගෙන ගිය රූපලාවන්‍ය මධ්‍යස්ථාන 6 ක් තාවකාලිකව වසා දැමීමට ආර්ථික සහ වාණිජ අමාත්‍යාංශය පියවර ගෙන තිබේ. කල් ඉකුත් වූ නිෂ්පාදන පාවිච්චි කිරීම හේතුවෙන් සතියේ සිට සති 2 දක්වා වූ කාලයක් සඳහා මෙම මධ්‍යස්ථාන වසා තබා ඇත.

“අකාල්-මින්-අල්-වාජෙබ්” (අපට කරන්න පුළුවන් අවම දේ) යන තේමාව යටතේ රාමදාන් මාසයේදී ක්‍රියාත්මක කරන වැඩසටහනේ තවත් එක් පියවරක් ලෙසින් සිදුකළ සෝදිසි මෙහෙයුමකදී අමාත්‍යාංශය ඉහත මධ්‍යස්ථාන හඳුනා ගෙන තිබේ. මිල පාලනය වළක්වා පාරිභෝගිකයන් ආරක්ෂා කිරීමට හැකි වන පරිද්දෙන් වෙළෙඳ පොළ නිරීක්ෂණය කිරීමට රාමදාන් මාසයට පෙර සිට සහ රාමදාන් මාසය අතරතුර සෝදිසි මෙහෙයුම් වැඩි කිරීමට අමාත්‍යාංශය පියවර ගෙන ඇත. 

අමාත්‍යාංශය විසින් ඉහත රූපලාවන්‍ය මධ්‍යස්ථාන 6 ට දඩ නියම කොට ඒවා තාවකාලිකව වසා දමා ඇත්තේ 2008 අංක 8 දරන නීතියේ 7 වැනි වගන්තිය යටතේය. යම් නිෂ්පාදනයකට අදාළ සියලුම නිවැරැදි තොරතුරු එම නිෂ්පාදනයේ ඇසුරුම මත පැහැදිලිව පෙනෙන ලෙස සඳහන් කිරීමටත් කිසිම ආකාරයකින් පාරිභෝගිකයන් නොමග යවන සුළු විස්තරයක් එහි අන්තර්ගත 
නොකිරීමටත් සැපයුම්කරුවා වගබලාගත යුතු බව එම නීතියේ දැක්වේ.