යාපනය දිස්ත්‍රික් ලේකම් එන්.වේතනායගම් මහතා මින් ඉදිරියට තම කාර්යාලය ඉදිරිපිට උද්ඝෝෂණ පැවැත්වීම සඳහා අවසරය නොදීමට තීරණය කර ඇත.
මෙයට හේතුව වී ඇත්තේ පසුගිය දිනෙක යාපනය පළාත් සභාවේ සාමාජිකයින් කිහිපදෙනෙක් පැවැත්වූ උද්ඝෝෂණයක් නිසාවෙන් ඔහුට මුහුණදීමට සිදුවූ අකරතැබ්බයකි.
රජය බලහත්කාරයෙන් ඉඩම් අත්පත් කරගනිමින් සිටිනා බව කියමින් දිස්ත්‍රික් ලේකම් කාර්යාලය ඉදිරිපිට උද්ඝෝෂණයේ යෙදී තිබෙන ඔවුහු පසුව දිස්ත්‍රික් ලේකම්වරයා හමුවට ගොස් ඔහු අතට පෙත්සමක් භාරදී ඇත.
පෙත්සම භාරගෙන ඇති වේතනායගම් මහතා එය අදාළ බලධාරීන්ගේ අවධානයට යොමුකරන බවට සහතිකවී තිබේ.නමුත් එය පිළිගැනීමට උද්ඝෝෂකයන් කැමැත්තක් දක්වා නැත.
ඉක්මන් ප්‍රතිචාරයක් බලාපොරොත්තුවෙන් කාර්යාලය ඉදිරිපස රැදී සිටින බව පවසා ඔවුන් ඉවත්ව ගොස් ඇත්තේ වේතනායගම් මහතාගේ කාර්යාල දොර වසා අගුලද දමාගෙනය.
වහාම පොලිසිය කැදවුවද විරෝධතාකරුවන් කාර්යාලයට ඇතුල් වන වැරැන්ඩාව අවහිර කරමින් එහි වාඩිවී සිටි බැවින් වේතනායගම් මහතාට ළඟාවීමට පොලිස් නිලධරයින්ට හැකිව නොමැත.
බොහෝ වේලාවක් බලා සිටියද උද්ඝෝෂකයන් ඉවත් නොවූ තැන ඔහු කාර්යාලයේ පිටුපස දොර හැරගෙන පිටව ගොස් තිබේ.
දැන් ඔහු පොලිස් ආරක්ෂාවද ඉල්ලා තිබෙන අතර උතුරු පළාත් පොලිස් අධිකාරිවරයා වෙත තම කාර්යාල භූමියට ආරක්ෂාව සළසන ලෙස දන්වමින් ලිපියක්ද යවා ඇත.
