වර්තමානයේ ශ්‍රී ලංකාවේ පිහිටුවා තිබෙන කුඩා ජල විදුලිබලාගාර පරිසර හිතකාමී විදුලිය නිපදවෙන බව පැවසුනද බොහොමයක් කුඩා ජල විදුලිබලාගාර පරිසර හිතකාමී නොවන දෝෂසහගත ව්‍යාපෘතීන් යැයි පාරිසරික නීතීඥ ජගත් ගුණවර්ධන මහතා අද (24) කොළඹදී පැවසීය.
කුඩා ජල විදුලි බලාගාර ඉදිකිරීමේ ව්‍යාපෘති වලදී ඉදිරිපත් කෙරෙන පාරිසරික වාර්තා වල පවතින දෝෂ සහගතභාවය අදාළ බලධාරීන් නිසිපරිදි අගැයුමට ලක් නොකීරීමත් ,මෙම ගැටලූව සමස්තයක් ලෙස නොදැකීම නිසාම මෙම තත්ත්වය ඇති වී ඇතැයි ගුණවර්ධන මහතා එහිදී වැඩිදුරටත් කීය
සීමාසහිත පාරිසරික පදනම හා ලංකා ජලනි ආයතන විසින් කුඩා ජල විදුලි බලාගාර නිසා වර්තමානයේ ඇතිවී තිබෙන පාරිසරික බලපෑම් සම්බන්ධයෙන් දැනුම්වත් කිරීම සඳහා ඊයේ (24) කොළඹ 07 ,රාජකීය විද්‍යාලයේ පැවති මාධ්‍ය හමුවකදී අදහස් දක්වමින් නීතිඥ ජගත් ගුණවර්ධන මහතා මේ බව කීය.
ගුණවර්ධන මහතා කියා සිටියේ සබරගමුව පළාතේ ගංගා ,ඇළ වේලි හරස් කරමින් ඉදිකර ඇති කුඩා ජල විදුලි බලාගාර නිසා ඇති වී තිබෙන පාරසරිකව අහිතකර බලපෑම් එල්ලවී ඇති බවය. 2014 වසරේ කළ පර්යේෂණයකට අනුව කෑගල්ල දිස්ත‍්‍රික්කයේ පමණක් ඉදිකළ කුඩා ජල විදුලි බලාගාර 23 ක් නිසා එම ප‍්‍රදේශයේ ගංඟා ,ඇළ දොළ රැසක් මේ වන විට සීඳී යාමේ තර්ජනයට ලක්වී ඇති බවද හෙතෙම කීය.
මෙම මාධ්‍ය හමුවේදී අදහස් දැක්වූ මහාචාර්ය අයිවන් ද සිල්වා මහතා කියා සිටියේ මේ වන විට රටපුරා ස්ථාපිත කර තිබෙන් 145 කට අධික කුඩා ජල විදුලිබලාගාර වලින් නිපදවෙන විදුලි ප‍්‍රමාණය සියයට 50කටත් වඩා අඩු බවය.
එසේම කුඩා ජල විදුලි බලාගාර පිහිටිවීම පරිසර හිතකාමී ක‍්‍රියාවලියක් බවට ජාත්‍යන්තර රාජ්‍ය නොවන සංවිධාන බොහොමයක් හුවා දැක්වුවද එම මතය සම්පූර්ණයෙන්ම වැරදි සහගත යැයි ද මහාචාර්ය අයිවන් ද සිල්වා මහතා පැවසීය.
