වේලූපිල්ලේ ප‍්‍රභාකරන් ගෙන් පසුව එල්.ටී.ටී.ඊ නායකයා ලෙස සැලකෙන කේ.පී. හෙවත්් කුමරන් පද්මනාදන් අත්අඩංගුවට ගන්නා ලෙස ඉල්ලා ජනතා විමුක්ති පෙරමුණේ පාර්ලිමේන්තු මන්ත‍්‍රී විජිත හේරත් මහතා ගොනු කළ රිට් පෙත්සම තවදුරටත් පවත්වාගෙන යනවද නැද්ද යන්න පිළිබඳ තීරණය මේමස 30 වැනිදා අධිකරණයට දැනුම් දෙන ලෙස අභියාචනාධිකරණය අද(9) පෙත්සම්කාර පාර්ශවයේ නීතීඥවරුන්ට දැනුම් දුන්නේය.
කේ.පී. හෙවත් කුමරන් පද්මනාදන් රටින් පිටවීම තහනම් කරමින් මීට පෙර අභියාචනාධිකරණය පනවා තිබූ අතුරු තහනම් නියෝගයද ලබන 30 වැනිදා තෙක් දීර්ඝ කිරීමටද අධිකරණය තීන්දු කළේය.
කේ.පී අත්අඩංගුවට ගෙන ඔහුට එරෙහිව නීතීය ක‍්‍රියාත්මක කරන්නැයි ඉල්ලා ජනතා විමුක්ති පෙරමුණ පාර්ලිමේන්තු මන්ත‍්‍රී විජිත හේරත් මහතා ගොනු කළ රිට් පෙත්සම අභියාචනාධිකරණ විනිසුරු ප‍්‍රීති පද්මන් සූරසේන මහතා හමුවේ කැඳවිණී.
යුද හමුදාපති ,පොලිස්පති ,නීතිපති ඇතුළු පිරිසක් මෙහි වගඋත්තරකරුවන් ලෙස නම්කරනු ලැබ සිටිති.
ප‍්‍රධාන පෙළේ එල්.ටී.ටී.ඊ. නායකයෙකු වන කුමරන් පද්මනාදන් විදෙස් රටකදී අත්අඩංගුවට ගෙන මෙරටට රැගෙන ආ නමුත් ඔහු උතුරු ප‍්‍රදේශයේ නිදහසේ සිටිමින් කටයුතු කරන බව පෙත්සම්කාර පාර්ශවයේ නීතීඥවරු මීට පෙර අධිකරණය හමුවේ කරුණු ඉදිරිපත් කළහ.
ත‍්‍රස්තවාදී ක‍්‍රියා රැසක් සම්බන්ධයෙන් ඔහුට විරුද්ධව කිසිදු පියවරක් නොගැනීමත් ,ජාත්‍යන්තර පොලීසියටද අවශ්‍ය සැකකරුවෙකු වන කේ.පී ට එරෙහිව නීතිය ක‍්‍රියාත්මක නොවීමත් ගැටලූ සහගත බවට පෙත්සම්කරුවෝ සිය පෙත්සමින් පෙන්වා දෙති.
පෙත්සම ලබන 30 වැනිදා යළි කැඳවේ.
