ශ්‍රී ලංකාවේ ස්වාධිපත්‍යයට හානි කර කොන්දේසි මත ජීඑස්පී ප්ලස් සහනයට වඩා එවැනි සහනවලින් තොරව සිටීම සුදුසු යැයි පිවිතුරු හෙළ උරුමයේ ලේකම් උදය ගම්මන්පිල මහතා කියයි.
කොන්දේසි 58කට එකඟ වන්නේනම් එම සහනය පිළිබඳ ඉල්ලීම සලකා බැලිය හැකි බව යුරෝපා කොමිසම කියා ඇතැයිද එවැනි කොන්දේසිවලට යටත් වීමෙන් බරපතල ප්‍රශ්නවලට මුහුණුදීමට සිදුවනු ඇතැයිද ඔහු කීවේය.
යුරෝපා කොමිසම සමග වෙළඳ ගනුදෙනුවලදී විශේෂයෙන් ඇඟළුම් අපනයනයේදී ශ්‍රී ලංකාවට බදු සහනයක් ලැබිණි. 2010 ඒ සහනය ඉවත් කැරිණි. ඒ වනවිට ශ්‍රී ලංකාවේ රෙදිපිළි හා නිමි ඇඳුම් අපනයනයෙන් 37.4%ක් යුරෝපයටද 22.4%ක් ඇමරිකාවටද යැවිණි. ඒ බදු සහනය යටතේ ශ්‍රී ලංකාවේ ඇඟළුම් තීරු බදු රහිතව යුරෝපයට අපනයනය කළ හැකි විය.
එමගින් ඇමරිකා ඩොලර් කෝටි 15ක් (රුපියල් කෝටි 2186) පමණ ආදායමක් ලැබිණි. 2010න් පසු එම සහන නොලැබිණි. ඊට හේතු වූයේ පසුගිය රජය සමයේ ශ්‍රී ලංකාවේ මානව හිමිකම් වාර්තාව පරීක්ෂා කර බැලිය යුතු යැයි යුරෝපා සංගමය කළ ඉල්ලීම රජය ඉවත දැමීමයි.
