පානදුර පල්ලිමුල්ල- ගොරකපොළ ප්‍රදේශ අතර පරණ ගාලු පාර ප්‍රතිසංස්කරණය කර දෙන්නැයි ඉල්ලා ගම්වැසියෝ වීදි බැස සිටිති. 

පානදුර පාලම අසල සිදුකරන මෙම උද්ඝෝෂණය හේතුවෙන් පානදුර - ගාලු පාර අවහිර වී ඇතැයි පොලිසිය කියයි.

බැනර් පුවරු රැගෙන මාර්ගය අවහිර කරමින් විරෝධතාවයේ නියැලෙන පෙළපාලිකරුවෝ අබලන් වු මාර්ගයේ සංවර්ධනය වසර තුනකට පෙර ඇරඹුවත් එයට බාලගිරිදෝශය ලබා ඇති බව කියති. පල්ලිමුල්ල සිරිනිවාසාරාම විහාරස්ථානයේ විහාරාධිකාරී හිනිදුම සුගතවංශ හිමියන් ඇතුළු ප්‍රදේශවාසින් උද්ඝෝෂණය සංවිධානය කර ඇත.

පෙළපාලිකරුවෝ පරණ ගාලුපාර අවහිර කරමින් උද්ඝෝෂණයේ යෙදීම හේතුවෙන් වාහන ගමනාගමනයද ඇණහිට ඇත.

අපොස උසස් පෙළ විභාගයේ විභාග අපේක්ෂකයන්ට බාධාවක් නොවන පිණිස උද්ඝෝෂකයන් ගාලු - පානදුර පාරෙන් පැය බාගයකට ඉවත්වූ බවත් බලධරයකු එනතුරු උද්ඝෝෂණය පවත්වන බවත් උද්ඝෝෂකයෝ කියති.

ඡායාරූප - රේඛා තරංගනී ෆොන්සේකා

වීඩියෝ - බිමල් ශ්‍යාමන් ජයසිංහ