චාවකච්චේරියෙන් පුපුරණ ද්‍රව්‍ය කිහිපයක් හමු වූ පමණින් ජාතික ආරක්‍ෂාවට තර්ජනයක් පවතින බව කිව නොහැකි යැයි ආරක්‍ෂක ලේකම් කරුණාසේන හෙට්ටිආරච්චි මහතා පැවසීය.
රටේ ආරක්‍ෂාව සම්බන්ධයෙන් කිසිඳු ගැටළුවක් නැති බව කී ආරක්‍ෂක ලේකම්වරයා ඉදිරියේදීත් ආරක්‍ෂාවට තර්ජනයක් විය හැකි කිසිවකට ඉඩ නොතබන බව සඳහන් කළේය.
යුද්ධයෙන් පසු විවිධ අවස්ථාවලදී මෙවැනි ආයුධ සොයාගැනීම් පිළිබඳව බුද්ධි අංශ වාර්තා කර ඇතැයි කී ආරක්‍ෂක ලේකම් චාවකච්චේරි ආයුධ තොගයක් ජාතික ආරක්‍ෂාවට මහා තර්ජනයක් විය හැකි බව කිසිවකු හෝ කියන්නේ නම් එය රටේ ආරක්‍ෂක කටයුතු පිළිබඳ කිසි අවබෝධයකින් තොරව කරන ප‍්‍රකාශයක් බවද ප‍්‍රකාශ කළේය.
මෙවැනි සිද්ධී ගැන පොලීසිය නිසි ආකාරයෙන් පරීක්‍ෂණ කරනු ඇතැයි කී හෙට්ටිආරච්චි මහතා පොලීසිය දෙන තොරතුරු තක්සේරු කර ඒ අනුව කටයුතු කිරීම ආරක්‍ෂක අමාත්‍යාංශයේ වගකීම බව ද කියා සිටියේය.
