විදේශ සේවා නියුක්ති කාර්යාංශයේ තංගල්ල විගමනික සම්පත් මධ්‍යස්ථානයේ පුහුණුව ලබන මැදපෙරදිග ගෘහ සේවිකාවන් වශයෙන් යෑමට නියමිත කාන්තාවන් 121දෙනෙකු ආහාර වර්ජනයක යෙදී ඇතැයි එම කාන්තාවෝ පවසති.
ආහාර සැපයුම් කරුවෙකු හරහා විදේශ සේවා මධ්‍යස්ථානය මගින් සපයනු ලැබූ ආහාර ලබා ගැනීමෙන් පසු රෝගී වූ බව කියන පුහුණුව ලබන කාන්තාවන් 16දෙනකු අඟහරුවාදා (29) රෝහල් ගත කළ බවත් විදේශ සේවා නියුක්ති කාර්යාංශයේ තංගල්ල කාර්යාලයේ නිලධාරියකු පැවසීය.
පුහුණුව ලබන කාන්තාවන් පවසන්නේ ගෘහ සේවිකාවන් වශයෙන් විදේශගත වීමට පෙර විදේශ සේවා නියුක්ති කාර්යාංශයෙන් දින 40ක නේවාසික පුහුණුවක් ලබා දෙන බවයි.එම පුහුණුව සදහා එක් කාන්තාවකගෙන් පුහුණු වීමේ ගාස්තු වශයෙන් රුපියල් 13822ක් අය කරන බවත් ඊට අමතරව ආහාර ලබා දීම සදහා රුපියල් 12000ක මුදලක් කාර්යාංශය මගින් අය කරන බවත් ඔවුහු පවසති. තමන්ගෙන් මුදල් අය කර පිරිසිදු ආහාර වේලක් ලබා දීමට කාර්යාංශය කටයුතු නොකරන බව එම කාන්තාවෝ පවසති.
තංගල්ල නගරයේ කාන්තාවක් පසු ගිය දින කිහිපය පුරා දුන් ආහාර ඉතා අපිරිසිදු බවත් පිළුණු ව තිබූ බවත් එම කාන්තාවෝ පවසති. තංගල්ල විගමනික මධ්‍යස්ථානයේ නිළධාරීන් මේ ප්‍රශ්නය සම්බන්ධයෙන් අසරණ බවත් ඉහල නිළධාරීන් ගේ නොසැලකිල්ල හා දරදඩු ප්‍රතිපත්ති නිසා ගෘහ සේවය සදහා පිටත්ව යාමට නියමිත පුහුණුව ලබන කාන්තාවෝ දැඩි පීඩනයකට පත්ව ඇති බවත් කියති. තමන් ආහාර වර්ජනය කරනවිට තංගල්ල කාර්යාලයේ නිලධාරීන් මුදල් එකතු කොට කාර්යාලයේ මුළුතැන් ගෙයි ආහාර පිස තමන්ට කන්නට දුන් බවද එම කාන්තාවෝ පැවසූහ.
පුහුණුව ලබන කාන්තාවන් පවසන්නේ ඔවුනට ආහාර ලබා දීම සඳහා වෙනත් ආයතනයක් පත් කොට පිරිසිදු ආහාර වේලක් ලබා දෙන තෙක් තමන් ආහාර වර්ජනය කරන බවයි. මේ සම්බන්ධයෙන් තංගල්ල විගමනික සම්පත් පධ්‍යස්ථානයේ නිලධාරීන්ගෙන් අප කරුණු විමසුවද ඔවුන් මාධ්‍යයට තොරතුරු ලබා දීමට නොහැකි බව පැවසූහ.
