මෝස්තර නිරූපිකාවක ලෙස කලා ක්ෂේත්‍රයට එක් වූ තක්ෂිලා සෙව්වන්දි මේ වනවිට වඩාත් ජනප්‍රිය වී ඇත්තේ රංගන ශිල්පිනියක ලෙසිනි. වෙළෙඳ දැන්වීම්, ගීත රූප රචනා මෙන්ම ඩී.වී.ඩී. චිත්‍රපට රංගන ශිල්පිනියක ලෙස දැනට බොහෝ නිර්මාණ ප්‍රමාණයකට දායක වී ඇති තක්ෂිලා, මේ දිනවලද ඩි.වී.ඩි චිත්‍රපට කිහිපයක රූපගත කිරීම් කටයුතු සඳහා දායකව සිටින්නීය. ඒ පිළිබඳව හා ඉදිරි කලා කටයුතු පිළිබඳව අදහස් දැක්වීමට ඇය මෙලෙස "සාරවිට"ට ගොඩ වැදුණාය.
"මේ දවස්වල දිවයිනේ විවිධ ප්‍රදේශවල ඩී.වී.ඩී චිත්‍රපට 5ක රූපගත කිරීම් කරනවා. ඉතින් ටිකක් විතර කාර්යබහුලයි. දැනට මම ඩී.වී.ඩී චිත්‍රපට 25ක විතර රංගනයෙන් දායක වෙලා තියෙනවා. ඉදිරියේදී මම ඩී.වී.ඩී. චිත්‍රපට නිෂ්පාදනයටත් යොමු වෙන්න අදහසක් තියෙනවා. දැනට ඩී.වී.ඩී. චිත්‍රපට සඳහා හොඳ වෙළෙඳ පොළක් හැදිලා තියෙනවා. ඒ නිසා තමයි නිෂ්පාදනය පැත්තටත් යොමු වෙන්න අදහස් කළේ. අන්තිමට මම ටෙලි නාට්‍යයකට සම්බන්ධ වුණේ මේ දිනවල දෙරණ නාළිකාවේ විකාශය වන "දේදුන්නයි ආදරේ" කියන ටෙලි නාට්‍යයට. එහි සුළු චරිතයක් රඟපෑවා. නිළියක් විදිහට ජනතාව අතරට ගියේ ආනන්ද අබේනායක මහත්මයාගේ "අප්පච්චි" කියන ටෙලි නාට්‍යයේ මා කළ චරිතය හරහා. ඊට අමතරව මම "ශ්‍රී දළඳාගමනය", "විජය - කුවේණි" හා "ශ්‍රීමත් අනගාරික ධර්මපාල උතුමාණෝ" කියන චිත්‍රපටවලත් රංගනයෙන් දායක වූවා."
බුද්ධික සේනාධීර
