කාන්තාවක් රූප සුන්දරියක් වෙන්න පංචකල්‍යාණය තියෙන්න අවශ්‍යයි. ඒ දේ සරුසාරව තියෙන කෙනෙක් තමයි රූප සුන්දරියක් වෙන්නෙ. ඒ විදියට රූප ස්වභාවය හිමි අවුරුදු කුමාරියක් වන පියුමි ශානිකා කලා ක්ෂේත්‍රයට පිවිසුනු ආකාරය පිළිබඳව අප සමග පැවසීය.
2001 තමයි මම අවුරුදු කුමාරි තරගයට සහභාගි වුණේ. ඒ සඳහා මගෙ මාමා අයදුම් කරලා තිබුණා පත්තරේක දැන්වීමක් දැකලා. මොකද මගෙ මාමා ගොඩක් පත්තර බලන කෙනෙක්.
ඒ විදියට අයදුම්පත දාලා එහිදී මූලික වටයට මාව තේරුණා කියන ලිපිය ගෙදරට එනකම්ම මම දැනගෙහ හිටියෙ නෑ මෙහෙම දේකට අයදුම් කරලා කියලා.
මුලින්ම මම මේ සඳහා සහභාගි වෙන්න බෑ කියලත් ආයෙත් සහභාගි වුණේ.
එදා දවසෙ 170 අධික ප‍්‍රමාණයක් හිටියා. එහිදී පළමු වටයේදී බැලූවේ අපේ ස්වරූපය සහ ප‍්‍රියමනාප ගතිය. එතනින් පසුව අවුරුදු උත්සවය දවසේ උදේ සාමාන්‍ය ඇඳුමින් සැරසිලා එන්න කිව්වෙ. ඉතින් මට මතකයි ඒ දවසේ ඇඳලා ගියේ රතු ඩෙනිම් එකයි කලූ ටී ෂර්ට් එකයි. ඒ ඇවිල්ලා බලද්දි අනිත් හිටපු ගෑනු ළමයි හොඳ ලස්සනට ඇඳලා ඇවිල්ලා තිබුණා. මම මහ ලොකුවට ලෑස්ති වෙලා ගියෙත් නෑ. සාමාන්‍ය විදියට එන්න කියපු නිසා. ඒ දවසෙ එතනට ඇවිල්ලා හිටියෙ ඊළඟ වටයට තෝරගත්තු 50 දෙනෙක්.
එතනදි සාමාන්‍ය දැනීම ප‍්‍රශ්න ඇසීම් වටයක් තිබුණෙ.
එතනින් පසුව අවසාන වටය සඳහා 30ක් තෝරාගත්තා. ඒ සඳහා හමුදාපති ඇතුළු කිහිපදෙනෙක් තමයි හිටියෙ තෝරන්න. ලක්හඬ, ITN සහ පනාගොඩ කෑම්ප් එකත් සමග බද්ධව කරපු අවුරුදු උත්සවයක් තමයි ඒ.
මම අවුරුදු උත්සවයට සහභාගි වුණේ මගේ පවුලෙ අම්මයි, තාත්තයි, මාමයි එක්ක. ඉතින් රටපුරා ඉන්න අනිත් අවුරුදු කුමාරියන්ගේ පවුල්වල අයත් ඇවිල්ලා හිටියා. ඒ හැමෝම බලන් ඉද්දි මට ගොඩක් ලැජ්ජත් හිතුණා. ඒත් කොහොම හරි තරගයට සහභාගි වුණා.
අවුරුදු කුමාරි තරගය සඳහා මම ඇන්දෙ කහ පාටට හුරු මල් තියෙන කලූ රෙද්දයි කහපාට හැට්ටෙයි.
ඉතින් කොහොම හරි අවසාන වටේටත් තේරුණා. ඒ අතරින් අවසාන තිදෙනාගේ නම් කියත්දි මම හිතුවා මම 3ටවත් ඇති කියලා. ඒත් නෑ. 2 වැනි ස්ථානයටත් මගේ නම කිව්වෙ නෑ. ඉතින් මම හිතුවා මාව තේරිලා නැතිව ඇති කියලා.
ඒත් මගෙ අම්මා කියනවා ඇහෙනවා මගෙ නම. මට ඒ මොහොතෙ ලැජ්ජත් හිතුණා. මම නෙමෙයින් කියලා. ඉතින් මට හිතාගන්නවත් බැරි විදියට අවසානෙදි මගේ නම කිව්වා. ඇත්තටම මට හරි පුදුමයි. ඒ වගේම ගොඩක් සතුටුයි. මට තෑගි විදියට ලක්හඬ රේඩියෝ එකේ පුහුණුවෙන්න අවස්ථාවක් ලැබුණා. ඒක ලොකු භාග්‍යයක්. ඉතින් මම අවුරුද්දක් නිවේදිකාවක් ලෙස පුහුණු වුණා. එතනින් පසු අවරුද්දක් රූපවාහිනියේ නිෂ්පාදන කටයුතුවලට පුහුණුවෙන්න අවස්ථාව ලැබුණා. එතනින් පසුව තමයි හිමින් හිමින් කලා අංශයට යොමුවුණේ.
ධනු විජේරත්න /ඡායාරූප - අන්තර්ජාලයෙනි
