ත්‍රස්ත තර්ජන නිසා බහරේනයේ තෙල් සහ ගෑස්වලට සම්බන්ධ ආයතනවල ආරක්ෂාව වැඩි කර තිබේ.
ඒ අනුව බැප්කෝ පිරිපහදුවේ නව තාක්ෂණයෙන් යුතු පාලන මැදිරියක් ස්ථාපිත කර ඇති අතර බනාගෑස් හි දැනටමත් පැය 24 පුරාම ක්‍රියාත්මක වන ආරක්ෂක මධ්‍යස්ථානයක් පිහිටුවා ඇත. එහි ඇති ආරක්ෂක කැමරා 300 ක් හදිසි අවස්ථාවකදී ප්‍රතිචාර දැක්වීමට සූදානම් කර ඇති පාලක වාහන වෙත සම්බන්ධ කර ඇත.
එසේම සිය සියලුම මධ්‍යස්ථානවල ආරක්ෂාව ඉහළ නංවා ගැනීම සඳහා ජාතික තෙල් සහ ගෑස් අධිකාරිය (නොගා) මේ වන විටත් අභ්‍යන්තර අමාත්‍යාංශය සමග සහයෝගයෙන් කටයුතු කරමින් සිටින බව බලශක්ති අමාත්‍ය ආචාර්ය අබ්දුල්හුසේන් මිර්සා පවසයි.
මෙම ආරක්ෂක වැඩපිළිවෙළට අධි තාක්ෂණික වැටක් සහ චලන සංවේදක සවිකිරීම, සේවකයන් සඳහා ජෛවමිතික ස්කෑනර් ස්ථාපිත කිරීම සහ අමතර ආරක්ෂිත කැමරා පද්ධතියක් ස්ථාපිත කිරීමද ඇතුළත් වන බව පසුගියදා මනමා නුවර පැවැති ප්‍රධාන පෙළේ සම්මන්ත්‍රණයක් අමතමින් ඇමැතිවරයා පැවැසීය.
