බලපත් රහිත අලියකු ළඟ තබා ගත්තැයි කොළඹ හිටපු අතිරේක මහේස්ත්‍රාත් තිළිණ ගමගේට ගංගොඩවිල මහේස්ත්‍රාත් කණිෂ්ක විජේරත්න මහතා විසින් පසුගිය ජුනි දෙවැනිදා ඇප දෙමින් කළ නියෝගය ලබන 21 වැනිදා තෙක් කොළඹ මහාධිකරණය විසින් අත්හිටැවිණි. එදින උසාවි පැමිණෙන ලෙස ඔහුට නියෝග කැරිණි.
නීතිපති වෙනුවෙන් රජයේ ජ්‍යෙෂ්ඨ නීතීඥ දිලීප පීරිස් මහතා මහාධිකරණයට ඉදිරිපත් කරමින් ගංගොඩවිල මහේස්ත්‍රාත් තීරණය සංශෝධනය කරන්නැයි කළ ඉල්ලීම හා දැක්වූ කරුණු සැලකිල්ලට ගත් විනිසුරු මනිලාල් වෛද්‍යතිලක මහතා මෙම නියෝගය කළේය.
නීතිපති ඉල්ලා සිටියේ ගංගොඩවිල මහේස්ත්‍රාත් තීරණය අත්හිටුවන ලෙසයි.
දිලීප පීරිස් මහතා කරුණු දක්වමින් පැවසුවේ සැකකාර හිටපු මහේස්ත්‍රාත් 2012 මාර්තු හත් වැනි දා යටවර නම් පුද්ගලයකුගෙන් අලි පැටවකු මිලට ගෙන ඇති බවයි. එම ඇත්පැටවා ව්‍යාජ ලියැවිලි මත වනජීවී දෙපාර්තමේන්තුවේ ලියාපදංචි කර ඇති බව ද ඔහු කීවේය.
දැනට වැඩ තහනම් කර සිටින සැකකරු එම ව්‍යාජ ලියැවිලි මත මෙම අලිපැටවා පෙරහර හා වෙනත් අවස්ථාවලදී ප්‍රයෝජනයට ගෙන ඇතැයි ද රජයේ ජ්‍යෙෂ්ඨ නීතීඥවරයා කීවේය.
අලිපැටවා රහස් පොලිසියට බාර දෙන ලෙස රහස් පොලිසිය 2015 මැයි මාසයේ ඔහුට දන්වා සිටියත් ඔහු ගෙය නොපිළිගත් බව ද, ඉන් පසු රහස් පොලිසිය මෙම අලිපැටියා අත්අඩංගුවට ගෙන පින්නවල අලි අනාතාගාරයේ අද දක්වා රැකවරණ සලසා ඇති බව ද ඔහු කීවේය.
යටවර විසින් මෙම පැටවා ගමගේට විකුණන ලදැයි යටවර මුලින් ප්‍රකාශ කර ඇති බව ද, එහෙත් පසුගිය අප්‍රේල් මාසයේ ඔහු රහස් පොලිසියට පවසා ඇත්තේ තමන් ළඟ කිසිම අලිපැටියකු නොසිටි බව ද, තිලිණ ගමගේ යන පුද්ගලයා කවුරුන්දැයි නොදන්නා බව ය.
දිලීප පීරිස් මහතා පැවසුවේ පෑස්සුම්කරුවකු වන යටවරට අලි පැටියකු නඩත්තු කිරීමේ හැකියාවක් නැති බවයි.
මේ අතර සැකකාර ගමගේ රහස් පොලිසියට එරෙහිව ශ්‍රේෂ්ඨාධිකරණයේ පැවරූ මූලික අයිතිවාසිකම් පෙත්සම ඉවත දමා ඇති බව ද නීතීඥවරයා දැන්වීය.
කටඋත්තරයක් ලියා ගැනීම සඳහා රහස් පොලිසියට පැමිණෙන ලෙස තිලිණ ගමගේට මැයි 13 හා 18 දිනයන්හි කළ ඉල්ලීම විවධ හේතු දක්වමින් ඔහු නොසලකා හළ බව ද, ඉන්පසු රහස්පොලිසිය ගංගොඩවිල මහේස්ත්‍රාත් උසාවියේ නඩු පැවරූ බව ද පීරිස් මහතා කීවේය.
පසුගිය මැයි 25 වැනි දා ගංගොඩවිල උසාවියට පැමිණෙන ලෙස සැකකාර හිටපු මහේස්ත්‍රාත්ට කොළඹ ප්‍රධාන මහේස්ත්‍රාත් නියෝග කළත් ඔහු එය ද මගහැරි බවත්, ඉන්පසු ජුනි දෙවැනිදා ඔහු ජනාධිපති නීතීඥ අලි සබ්රි හා අජිත් පතිරණ මහත්වරුන් පිරිවරාගෙන ගංගොඩවිල උසාවියේ පෙනී සිටි බවත් ඔහු සඳහන් කළේය.
තිලිණ ගමගේට ඇප ඉල්ලමින් ඔහුගේ ප්‍රධාන නීතීඥවරයා දෙපැයක් කරුණු දැක්වූ බවත් මෙම නඩුවේ ප්‍රස්තුත කාරණය පොදු දේපොළ පනත යටතට නොගැනෙන බවට කිසිම කරුණක් එම නීතීඥවරයා ඉදිරිපත් නොකළ බව ද විශේෂ හේතු මත සැකකරුට ඇප ඉල්ලමින් ඔහු කරුණු නොදැක්වූ බව ද දිලීප පීරිස් මහතා කියා සිටියේය.
වැඩ තහනමට ලක්වී සිටින සැකකරු ශ්‍රී ලංකා අධිකරණයේ කීර්ති නාමය කෙළෙසා ඇතැයි ද, ගංගොඩවිල මහේස්ත්‍රාත් වැරදි ක්‍රියාමාර්ගයක් අනුගමනය කරමින් ඔහුට ඇප නියම කර ඇතැයි ද රජයේ ජ්‍යෙෂ්ඨ නීතීඥවරයා කීවේය.
