දෝහා නුවර ව්‍යාපාරික දිස්ත්‍රික්කයේ ඉදිකර ඇති හොටෙල් පාර්ක් උද්‍යානය නිල වශයෙන් විවෘත කළ බව කටාරා හොස්පිටැලිටි ආයතනය පවසයි. මෙය පවුල් තේමාව යටතේ ඉදිකර ඇති උද්‍යානයකි.
ෂෙරටන් ග්‍රැන්ඞ් දෝහා රෙසෝර්ට් ඇන්ඞ් කන්වෙන්ෂන් හෝටලයට යාබදව ඉදිකර ඇති මෙම උද්‍යානය කුඩා ජල උල්පත්, දිය ඇළි, කුඩා දිය කඩිති වැනි ජල විශේෂාංග මෙන්ම හොඳින් නඩත්තු කරන ලද තණ බිමකින්ද සමන්විතය.
හොටෙල් පාර්ක් උද්‍යානය හරහා අමුත්තන්ට මෙන්ම නගර වැසියන්ටද සන්ධ්‍යාව ගත කිරීම සුදුසු වාතාවරණයක්, ක්‍රීඩා කිරීමේ ප්‍රදේශයෙක් සහ පවුලේ සාජිකයන්ට රැස්වීම සඳහා එළිමහන් බිම් කඩක් යන පහසුකම් ලබාදී ඇත. මීට අමතරව ළමා ක්‍රීඩා පිටියක්, එළිමහන් භූමියක්, ශාරීරික යෝග්‍යතා කලාපයක් සහ වීඩියෝ වෝල් වැනි විනෝදාත්මක පහසුකම්ද හොටෙල් පාර්ක් උද්‍යානය තුළ ස්ථාපිත කර ඇත.
එසේම රස නහර පිනා යන ආහාර සහ ප්‍රණීත අතුරු පස අළෙවි කරන අවන්හල් පහක්ද ළඟදීම හොටෙල් පාර්ක් උද්‍යානය තුළ විවෘත වීමට නියමිතය.
උද්‍යානයේ භූගත රථ ගාල මට්ටම් හතරකින් සමන්විත වන අතර භූගත උමං මාර්ග පද්ධතිය ඔස්සේ රථ ගාලේ සිට දෝහා ජාත්‍යන්තර ප්‍රදර්ශන මධ්‍යස්ථානය වෙත ප්‍රවේශ විය හැකිය. රථ ගාලේ වාහන 2,500 ක් පමණ ගාල් කළ හැකිය.
මෙම උද්‍යානයේ කළමනාකරණ කටයුතු කටාර් කේන්ද්‍ර කොටගත් මොසනාඩා කළමනාකාරීත්ව සමාගම විසින් සිදුකරනු ඇත.
