අස්ගිරි මහා නායක පදවියට පත් වූ වරකාගොඩ ඤාණරතන නාහිමියන් බැහැදැකීමට ජනපති මෛත්‍රිපාල සිරිසේන මහතා අද (10) පස්වරුවේ මහනුවර අස්ගිරි මහා විහාරය වෙත ගොස් ආශිර්වාද ලබාගත්තේය.
එහිදී මාධ්‍ය හමුවේ අදහස් දක්වමින් ජනපති කියා සිටියේ බෞද්ධාගමිකයන් මෙන්ම අනෙකුත් සියලු ජාතීන් හා ආගමික පිරිස් එකතු කරගෙන ඔවුන් අතර සාමය සංහිඳියාව ඇති කරමින් යහපත් රටක් ගොඩනැගීම තම බලාපොරොත්තුව බවයි.
මහානායක හිමියෝ සෙත් පිරිත් සජ්ජායනා කර ජනපතිට අශිර්වාද පළ කළහ.
මල්වතු මහානායක තිබ්බටුවාවේ ශ්‍රි සුමංගල නාහිමියන් බැහැදැකීමටද ජනපති ගියේය.
අමාත්‍ය විජයදාස රාජපක්ෂ, මධ්‍යම පළාත් ආණ්ඩුකාර නිලුකා ඒකනායක, ප්‍රධාන අමාත්‍ය සරත් ඒකනායක යන මහත්ම මහත්මීහු පිරිසක් ද ඊට එක්ව සිටියහ.
ජනපති එහි පැමිණි අවස්ථාවේ එය ආවරණය නොකරන ලෙස මාධ්‍යවේදින්ට ජනපති ආරක්ෂක අංශ නිලධාරින් පවසා සිටි අතර අවසන් මොහොතේ එම අවස්ථාව ආවරණය කිරිම සඳහා අවස්ථාව ලබාදුන්නද ඇතැම් මාධ්‍යවේදීන්ට එම අවස්ථාව ගිලිහිණි.
අස්ගිරි මහා නායක හිමියන් ජනපතිට පිරිත් නුල් ගැට ගසා පිරිත් සඤ්ජායනා කිරිමේ අවස්ථාව ආවරණයට මාධ්‍යවේදින්ට ඉඩ නොලැබුණු අතර එහි ආරක්ෂක නිලධාරියෙක් මාධ්‍යවේදියකු තල්ලු කළේය..
ඡනපති මාධ්‍ය හමුවේ අදහස් දැක්විම සඳහා පැමිණි අවස්ථාවේදි ආරක්ෂක නිලධාරියා මාධ්‍යවේදීන් අතරින් යාමට සැරසෙද්දි ජනපති ඔහු ඉවත් කළේය.
මාධ්‍යවේදීන් වැළැක්වීම සම්බන්ධයෙන් ජනපතිට පැවසූ විට ජනපතිවරයා එසේ කළේ කවුදැයි විමසා සිටියේය.
ඡායාරූප - ජනාධිපති මාධ්‍ය අංශය
ඡායාරූප හා වීඩියෝ - චමිල් රූපසිංහ
