ජනාධිපති මෛත්‍රීපාල සිරිසේන මහතාගේ තීරණයෙන් මහ බැංකු අධිපති ධූරයට නම් කැරුණු ආචාර්ය ඉන්ද්‍රජිත් කුමාරස්වාමි මහතා අද (02) පෙරවරුවේ ජනාධිපති නිල නිවසේ දී ජනාධිපති හමු වී සුහද පිළිසඳරක නිරත විය.

1950 අප්‍රේල 03 වැනි දින උපත ලැබූ කුමාරස්වාමි මහතා කොළඹ රාජකීය විද්‍යාලයෙන් හා බ්‍රිතාන්‍ය හැරෝ විද්‍යාලයේන් මූලික අධ්‍යාපනය ලැබූවෙකි.

කීර්තිමත් තානාපතිවරයකු වූ රාජු කුමාරස්වාමි මහතාගේ පුත්‍රයකු වන ඉන්ද්‍රජිත් කුමාරස්වාමි මහතා මානව හිමිකම් ක්‍රියාධාරිනියක වන රාධිකා කුමාරස්වාමිගේ සහෝදරයෙක් ද වේ.

ඔහු සිය මූලික උපාධිය බ්‍රිතාන්‍ය කේම්බ්‍රිජ් විශ්ව විද්‍යාලයෙන් ලබා ගත් අතර ආචාර්ය උපාධිය බ්‍රිතාන්‍ය සසෙක්ස් විශ්ව විද්‍යාලයෙන් ලබාගෙන ඇත

අන්තර්ජාතික ආර්ථික විශේෂඥයකු වන ආචාර්ය කුමාරස්වාමි මහතා1973 වසරේදී ශ‍්‍රී ලංකා මහ බැංකුව සමග සම්බන්ධ වී ඇති අතර ආර්ථික පර්යේෂණ, සංඛ්‍යාලේඛන සහ බැංකු අධීක්ෂණ කොට්ඨාශ නිලධාරියෙකු ලෙස 1989 වසර දක්වා සේවය කර ඇත.

1981 සිට 1989 කාලයේ මුදල් හා ක‍්‍රමසම්පාදන අමාත්‍යාංශයට ද අනියුක්ත කොට තිබූ කුමාරස්වාමි මහතා 1990 සිට 2008දක්වා බි‍්‍රතාන්‍ය පොදුරාජ්‍ය මණ්ඩලීය මහලේකම් කාර්යාලයේ ආර්ථික කටයුතු පිළිබඳ අධ්‍යක්ෂ වශයෙන් ද මහලේකම් වරයාගේ කාර්යාලයේ නියෝජ්‍ය අධ්‍යක්ෂ ලෙස ද කටයුතු කර තිබේ. පසුව නැවතත් පොදුරාජ්‍ය මණ්ඩලීය මහලේකම් කාර්යාලයේ සේවයට එක් වන ඒ මහතා සමාජ ප‍්‍රතියෝජන වැඩසටහන් අංශයේ අන්තර්වාර අධ්‍යක්ෂක වශයෙන් ද කටයතු කළේය.

කුමාරස්වාමි මහතාගේ බිරිය තාරාය. ඔවුනට පුත්තු දෙදෙනෙක් සිටිති.

දක්ෂ ක්‍රීඩකයෙකු වූ ඔහු 1974 දී ශ්‍රී ලංකා රගර් කණ්ඩායමේ නායකත්වයද දරා ඇත.

කොළඹ රාජකීය විද්‍යාලයේ රගර් කණ්ඩායමේද නායකයා වූ ඔහු කේම්බ්‍රිජ් සරසවියේ ක්‍රිකට් කණ්ඩායමේද සාමාජිකයෙකි.

(ඡායාරූප - ජනාධිපති මාධ්‍ය අංශය)