නාය යාමට ලක් වූ ප්‍රදේශ අධි ආරක්ෂිත කලාප ලෙස ප්‍රකාශයට පත් කිරීමට අද (23) ජනාධිපති කාර්යාලයයේ දී පැවැති රැස්වීමක දී තීරණය විය.
හදිසි ආපදා තත්ත්වය කළමනාකරණය කර ගනිමින් ජන ජීවිත යථා තත්ත්වයට පත් කිරීම සඳහා මෛත්‍රීපාල සිරිසේන ජනපති විසින් පිහිටවනු ලැබූ ජනාධිපති කාර්ය සාධක බළකාය අද පස්වරුවේ රැස්විණි.
අග්‍රමාත්‍ය රනිල් වික්‍රමසිංහ මහතා මෙන්ම විෂය භාර අමාත්‍යවරුන් ද ජනාධිපති ලේකම්වරයා ඇතුළු අමාත්‍යාංශය ලේකම්වරු ද, ත්‍රවිධ හමුදාපතිවරු ඇතුළු ආරක්ෂක අංශ නිලධාරිහු ද ඊට සහභාගී වූහ.
පවතින තත්ත්වයට සාර්ථකව මුහුණ දෙමින් එම ජනතාව වෙනුවෙන් අවශ්‍ය උපරිම සහන සැළසීමට කටයුතු කරන ලෙස නිලධාරින්ට උපදෙස් දුන් ජනපතිවරයා මුදල් ගැලළුවක් කර නොගෙන සුබසාධන සේවා ක්‍රියාත්මක කිරීමට ද උපදෙස් දුන්නේය.
ආපදා තත්ත්වයෙන් බලපෑමට ලක්වූ එක් නිවසක් වෙනුවෙන් ක්ෂණික ආධාරයක් වශයෙන් රුපියල් 10,000 ක දීමනාවක් ලබාදීමට ද තීරණය විය.
අද සිට කොළඹ දිස්ත්‍රික්කයේ කිසිදු ඉඩම් ගොඩකිරීමකට ඉඩ නොදෙන ලෙස ද ජනපති නිලධාරින්ට උපදෙස් දුන්නේය.
අවතැන් වූ ජනතාව නැවත පදිංචි කරවීම වෙනුවෙන් කළයුතු ඉඩම් පවරා ගැනීමේ කටයුතු විධිමත් අයුරින් සිදු කරන ලෙස උපදෙස් දුන් ජනාධිපතිවරයා පාසල් දරුවන්ගේ අධ්‍යාපන කටයුතු වෙනුවෙන් විශේෂ වැඩපිළිවෙලක් ක්‍රියාත්මක කිරීමටද උපදෙස් දුන්නේය.
ගංවතුරින් යටවූ නිවාස පදිංචියට සුදුසු තත්වයක තිබේදැයි පරික්ෂා කිරීමට ද ගොඩනැගිලි පර්යේෂණ දෙපාර්තමේන්තුවේ නිලධාරින්ට උපදෙස් දුන් අතර හානියට පත් ප්‍රදේශ සුද්ධ පවිත්‍ර කිරීම වෙනුවෙන් විශේෂ වැඩපිළිවෙලක් ක්‍රියාත්මක කිරීමට ද උපදෙස් දුන්නේය.
