නගර සභා සහ පරිසර අමාත්‍යාංශයේ ප්‍රමිතිකරණ සංවිධානය විසින් අධි දීප්ත විදුලි බුබුළු ආනයනය සහ අලෙවිය තහනම් කර තිබේ.
මෙම තහනම ලබන නොවැම්බර් 1 වැනිදා සිට බලපැවැත්වෙන අතර ඊට තාපදීප්ත ටංස්ටන් විදුලි බුබුළු (වොට් 40 සහ 60) ද ඇතුළත් කර ඇත.
පරිසරය සුරැකීම, මහජන සහ පුද්ගල දේපොළ සුබසාධනය පවත්වාගෙන යාම මෙන්ම කටාර් ජාතික දැක්ම 2030 ට සමාගාමීව පිරිසිදු පරිසරයක් නිර්මාණය කළ හැකි තිරසාරත්වයක් අත්පත් කරගැනීමට ඇති තම කැපවීමේ තවත් පියවරක් ලෙසින් ඉහත තහනම පැනවූ බව නගර සභා සහ පරිසර අමාත්‍යාංශ පවසයි. මහජනතාවගේ යහපත තකා තාපදීප්ත විදුලි බුබුළු ආනයනය කිරීමෙන් සහ අලෙවි කිරීමෙන් වළකින ලෙසට අමාත්‍යාංශය සියලුම වෙළෙන්දන්ගෙන් සහ ආනයනිකයන්ගෙන් ඉල්ලීමක් කර තිබේ. අධි දීප්ති විදුලි බුබුළු ආනයනය සහ බෙදා හැරීම වැළැක්වීම සඳහා අදාළ බලධාරීන්ගේ සහයෝගය ඇතිව නිරීක්ෂණ වැඩසටහන් දියත් කිරීමට සැළසුම් කර ඇති බවද ප්‍රමිතිකරණ සංවිධානය අවධාරණය කරයි.
කටාර් පොදු විදුලිබල සහ ජල සංස්ථාව (කරාමා) විසින් අමාත්‍යාංශය සහ වෙනත් අදාළ ආයතනවල සහයෝගය ඇතිව ටංස්ටන් විදුලි බුබුළු (වොට් 75 සහ 100) අලෙවිය සහ ආනයනය සඳහා තහනමක් පනවනු ලැබුවේ පසුගිය මැයි මාසයේදීය. සංස්ථාවේ “කටාර් රාජ්‍යය තුළ හොඳ ජීවන තත්ත්වයක්” යන ව්‍යාපෘතියේ පියවරක් ලෙසින් විදුලි පරිභෝජනය සහ පීඩාකාරී කාබන් විමෝචනය පහළ දැමීම මෙම තහනමේ ප්‍රධානම අරමුණක් බව එම අවස්ථාවේදී අවධාරණය කෙරුණි. සංරක්ෂණ සහ බලශක්ති කාර්යක්ෂම ජාතික වැඩසටහන (ටාර්ෂීඞ්) යටතේ කරාමා ආයතනය විසින් තාපදීප්ත විදුලි බුබුළුවලින් සිදුවන බලපෑම ගැන මෙන්ම බලශක්තිය ඉතිරි කරන විදුලි බුබුළු පාවිච්චියෙන් ලැබෙන ප්‍රතිලාභ සම්බන්ධව දැනුම්වත් කිරීමේ වැඩසටහනක් දියත් කළේය.
