එමීර් කුසලාන වොලිබෝල් තරගාවලියට සමාගාමීව කටාර් වොලිබෝල් සංගමය විසින් සංවිධානය කරනු ලබන ප්‍රජා වොලිබෝල් අභියෝග ශූරතාව 2016 තරගාවලියට සහභාගි වීම සඳහා ශ්‍රී ලන්කන්ස් ක්‍රීඩා සමාජයට ආරාධනා ලැබී තිබේ.
තරගාවලිය සඳහා ශ්‍රී ලංකාව, ඉන්දියාව, පිලිපීනය හා නේපාලය යන රටවල් නියෝජනය කරමින් කණ්ඩායම් හතරක් තරග වදින අතර තරගකාරීත්වය වැඩි කිරීමේ අරමුණෙන් අදාල රටෙහි ජාතික වොලිබෝල් කණ්ඩායම් නියෝජනය කරන ක්‍රීඩකයන් තිදෙනෙකු බැගින් සහභාගි කරගැනීමට කටාර් වොලිබෝල් සංගමය අවසර දී ඇත.
ඒ අනුව ශ්‍රී ලංකන්ස් ක්‍රීඩා සමාජය වෙනුවෙන් ශ්‍රී ලංකා වොලිබෝල් කණ්ඩායමේ නායක, උස පන්දු ප්‍රහාරක ජනිත සුරත්, උස පන්දු ප්‍රහාරක ගයාන් මධුශංක, පන්දු ඔසවන ක්‍රීඩක කසුන් චතුරංග සමග දැනට ශ්‍රී ලංකන්ස් කණ්ඩායමේ සිටින ප්‍රබලතම ක්‍රීඩකයන් ශ්‍රී ලංකාව නියෝජනය කරනු ඇත.
ශ්‍රී ලංකන්ස් ක්‍රීඩා සමාජය සහභාගි වන පළමු තරග පිලිපීනය සමග මැයි මස 11 වැනිදා (අඟහරුවාදා) දින පස්වරු 7 ට අල්සාද් අල්-අත්තියා ක්‍රීඩාගාරයේදීත්, දෙවන තරගය ඉන්දියාව සමග 12 වැනිදා (බාදාදා) දින පස්වරු 7 ටද, තෙවැනි තරගය නේපාලය සමග එදිනම පස්වරු
8.30 ටද අල්-අරාබි ගෘහස්ථ ක්‍රීඩාගාරයේදීත් පැවැත්වෙන අතර අවසාන මහා තරගය මැයි මස 13 වැනි දින පස්වරු 6 ට අල්සාද් අල්-අත්තියා ගෘහස්ථ ක්‍රීඩාගාරයේදී පැවැත්වේ.
එදිනම ඉතාලිය, කියුබාව, පෝලන්තය, රුසියාව සහ බ්‍රසීලය යන රටවල නියෝජනය කරන ක්‍රීඩකයන් සහභාගි වන එමීර් කුසලාන තරගාවලියේ අවසාන මහා තරගයද පැවැත්වෙනු ඇත.
මෙම තරගාවලිය නැරඹීමට ප්‍රවේශපත්‍ර අවශ්‍ය නොවන අතර පැමිණෙන ප්‍රේක්ෂකයන් අතුරින් කුසපත් ඇදීමෙන් තෝරාගන්නා වාසනාවන්තයන් වෙනුවෙන් වටිනා ත්‍යාග ලබාදීමට කටාර් වොලිබෝල් සංගමය සියලු කටයුතු සූදානම් කර ඇත.
තරගාවලිය පිළිබඳ වැඩි විස්තර 66727759 යන අංකයෙන් දුලිප් ලියනගේ ඇමැතීමෙන් ලබාගත හැක.
