හිටපු ජනපති මහින්ද රාජපක්ෂ මහතාගේ ප්‍රමුඛත්වයෙන් ඒකාබද්ධ විපක්ෂය සංවිධානය කරන ජන සටන පාද යාත්‍රාව මේ වන විට පිළීමතලාව නගරය පසු කරමින් ඉදිරියට ඇදෙයි.

ඒකාබද්ධ විපක්ෂය නියෝජනය කරමින් පාර්ලිමේන්තු මන්ත්‍රීවරුන් ද පළාත් සභා හා පළාත් පාලන නියෝජිතයෝ ද රංගන හා ගායන ශිල්පීන් ද තවත් විශාල පිරිසක් ද පාද යාත්‍රාවට එක්ව සිටිති. පේරාදෙණිය, කිරිබත්කුඹුර, ඇඹිල්මීගම ආදී ප්‍රදේශවලදී පාද යාත්‍රාව පිළිගැනීමට ඒ ඒ ප්‍රදේශවල ප්‍රාදේශීය දේශපාලනඥයන් කටයුතු යොදා තිබුණි.

මග දෙපස රතිඤ්ඤා දල්වමින් ඔවුහු පිළිගැනීමේ වැඩසටහන් සංවිධානය කර තිබිණි. පාද යාත්‍රාව හේතුවෙන් කොළඹ - නුවර ප්‍රධාන මාර්ගයේ වාහන ගමනාගමනයට බාධා ඇතිවී ඇති අතර මාර්ගයේ දිගු රථවාහන පෝලිම් දක්නට ලැබේ.

මහින්දානන්ද අලුත්ගමගේ, දිනේෂ් ගුණවර්ධන , විමල් විරවංශ, නාමල් රාජපක්ෂ, උදය ගම්මන්පිල යන මන්ත්‍රීවරු ද හිටපු ඇමැති රෝහිත බෝගෝල්ලාම ද පයින් ගමන් කළ අය අතර වෙයි.

මහජනයා  උද්යෝගයෙන් පාද යාත්‍රාවේ ගමන් කරතියි  ශ්‍රී ලංකාවේ කොමියුනිස්ට් පක්ෂය සභාපති රාජා කොල්ලුරේ මහතා පවසයි.

ජායාරුප - සෙනරත් බණ්ඩාර

ඡායාරූප හා වීඩියෝ - කෞශල්‍ය සමින්ද