පුරවැසි බලය සංවිධානය සහ සාධාරණ සමාජයක් සඳහා වූ ජනතා ව්‍යාපාරය එක්ව ‘ජනවාරි අට පැතූ යහපාලනය මේකද?‘ මැයෙන් කොළඹ මහජන පුස්තකාලයේ පැවැත්වූ සම්මන්ත්‍රණය ආරම්භයේ දී උණුසුම් තත්ත්වයක් ඇති විය.
කලාකරුවකු වන මොහාන් රාජ් මඩවල මහතා සභාව මෙහෙයවමින් මුල්ම කතාව කිරීමට ආචාර්ය නිර්මාල් රංජිත් දේවසිරි මහතාට ආරාධනා කළේය. සම්මන්ත්‍රණය ආරම්භ කරද්දී මාදුළුවාවේ සෝභිත හිමියන් සිහි කරමින් විනාඩියක නිශ්ෂබ්දතාවක් පැවැත්වූයේ නැතැයි කියමින් මහජනතාව අතර සිටි පුද්ගලයකු නැගිට වාද කරන්නට විය. ඒ සමග තවත් පුද්ගලයකු නැගිට ඔහුගේ සහායට කතා කරන්නට ගැනීමත් සමග උණුසුම් තත්ත්වයක් ඇති විය.
කරුණු පැහැදිලි කිරීමට මොහාන් රාජ් මඩවල මහතා උත්සාහ ගත්තද එම පුද්ගලයන් දෙදෙනාද ආවේග ශිලීව දිගින් දිගටම කතා කරන්නට වූහ.
ඒ අවස්ථාවේ නැගී සිටි රාවය කර්තෘ කේ ඩබ්ලිව් ජනරංජන මහතා කීවේ සෝභිත හිමිටත් නිගා දෙන ලෙස හැසිරෙන ඔවුන්ට කැමතිනම් සභාවෙන් එළියට යා හැකි බවයි. සභාවේ විනය රැකගෙන කටයුතු කරන ලෙසත්, ශාලාව පිරෙන්නට තවත් පිරිස් සිටියත් ඔවුන්ට ගැටළුවක් නැති බවත් ඔහු කීවේය.
සභාවේ සිටි තවත් කිහිප දෙනකු කීවේ තමන් නුවර සිට සම්මන්ත්‍රණයට පැමිණි බැවින් හැකි ඉක්මණින් කතා ආරම්භ කරන ලෙසයි.
ඉන් පසු ප්‍රථම කතාව ආරම්භ කිරීමට පෙර විනාඩියක නිශ්ෂබ්දතාවයක් පැවැත්වීමට සංවිධායකයෝ තීරණය කළහ.
ප්‍රථම කතාව ආරම්භ කරමින් ආචාර්ය නිර්මාල් රංජිත් දේවසිරි මහතා පැවසුවේ සෝභිත හිමියන්ට ගරු කිරීම විනාඩියකට සීමා කළ යුතු නැති බවයි. උන්වහන්සේට දක්වම ලොකුම ගෞරවය වන්නේ ඒ හිමියන් පැතූ සාධාරණ සමාජය ඇති කිරීමට කටයුතු කිරීම බව දේවසිරි මහතා කීවේය.
ඔහුගේ කතාවෙන් පසු ගැටළුවකින් තොරව සෙසු කථිකයෝ කතා කළහ.
සම්මන්ත්‍රණය සඳහා විශාල පිරිසක් සහභාගී වී සිටියහ.
