දිවිනැඟුම දෙපාර්තමේන්තුවේ මුදල් අක්‍රමිකතා, මුදල් විශුද්ධිකරණ ඇතුළු අසත්‍ය චෝදනා කිපයකට වගඋත්තරකරු කරමින් තමන්ට එරෙහිව චෝදනා ගොනු කරමින් ගම්පහ, කඩුවෙල හා පූගොඩ අධිකරණ කිහිපයක ගොනු කර ඇති නඩු විභාග වලින් තමන්ගේ පුද්ගලික නිදහසට බාධා එල්ල වී සිය මූලික අයිතිවාසිකම් උල්ලංඝනය වි ඇතැයි කියමින් හිටපු ආර්ථික සංවර්ධන අමාත්‍ය බැසිල් රාජපක්ෂ මහතා ගොනු කළ මූලික අයිතිවාසිකම් පෙත්සම කරුණු තහවුරු කිරීම සඳහා ජූනි 8 වැනිදා යළි කැඳවීමට ශ්‍රේෂ්ඨාධිකරණය අද(28) තීන්දු කළේය.
තමන්ව යළි අත්අඩංගුවට ගැනීම වැළැක්වීමේ නියෝගයක් නිකුත් කරන මෙන් ඉල්ලා හිටපු අමාත්‍ය බැසිල් රාජපක්ෂ මහතා විසින් ඉදිරිපත් කර තිබූ මූලික අයිතිවාසිකම් පෙත්සම අගවිනිසුරු කේ.ශ්‍රී පවන්, අනිල් ගුණරත්න සහ කේ.ටී .චිත්‍රසිරි යන ශ්‍රේෂ්ඨාධිකරණ විනිසුරු මඩුල්ල හමුවේ සළකා බැලුණු අතර එහිදි මෙම තීන්දුව ලබා දී තිබේ.
පෙත්සමට අදාළ ලේඛන ලබා ගැනීම සඳහා තවදුරටත් කල් අවශ්‍ය බව පෙත්සම අද(28) කැඳවූ අවස්ථාවේ බැසිල් රාජපක්ෂ මහතා වෙනුවෙන් පෙනී සිටි නීතිඥවරයා අධිකරණයට දන්වා සිටි අතර ඒ අනුව පෙත්සම සළකා බැලීම ජුනි මස 08 වනදාට කල්දැමීමට ශ්‍රේෂ්ඨාධිකරණය තීරණය කර තිබේ.
