අද පාර්ලිමේන්තුවේ දී මන්ත්‍රීවරයකුට පහර දී රෝහල් ගත කිරීමට සිදුවීම හා තවත් මන්ත්‍රීන් පිරිසක් තුවාල ලැබීම ගැන පරීක්ෂා කර වහාම වාර්තාවක් සැපයීම සඳහා කථානායක කරු ජයසූරිය මහතා විශේෂ කමිටුවක් පත් කළේය.

නියෝජ්‍ය කථානායක තිලංග සුමතිපාල හා කාරකසභා නියෝජ්‍ය සභාපති සෙල්වම් අඩෛක්කලනාදන් ද එම කමිටුවට අයත් වෙති.

වැරදිකරුවන් වන මන්ත්‍රීන්ට එරෙහිව විනය ක්‍රියාමාර්ග ගන්නා බවත් කථානායක ප්‍රකාශ කළේය. මෙම සිද්ධිය නිසා පස්වරු 1.35ට කල් තැබුණු පාර්ලිමේන්තුව යළි පස්වරු 3ට රැස්විය.

එම ගැටුම පිළිකුළෙන් හෙළා දකින බව කථානායකවරයා ප්‍රකාශ කළේය. පාසල් සිසුන් හා අමුත්තන් රැසක් මහජන ගැලරිවල සිටියදී ඇතිවූ මේ සිද්ධිය පාර්ලිමේන්තුවේ අභිමානයට හා කීර්ති නාමයට බලවත් කැළලක් බවත් කී කථානායකවරයා, එක් මන්ත්‍රීවරයකු රෝහල් ගත කර ඇතැයි ද තවත් මන්ත්‍රීන් කිහිප දෙනකු තුවාල ලබා ඇතැයිද කීවේය.

පාර්ලිමේන්තුව බදාදා (4) පස්වරු 1 දක්වා කල් තැබිණි.