මන්ත්‍රී දීමනා වැඩිකිරීම සඳහා ඉදිරිපත් කර තිබූ යෝජනාව ඉවත් කර ගැනීමට බදාදා පැවැති පක්ෂ නායක හමුවේදී තීරණය කර ඇතැයි රජයේ ආරංචි කියයි.
ජනමාධ්‍ය අමාත්‍ය ගයන්ත කරුණාතිලක මහතා අද (24) පාර්ලිමේන්තුවට මේ සම්බන්ධ දළ සටහනක් ඉදිරිපත් කිරීමට නියමිත අතර පාර්ලිමේන්තු ගෘහස්ත කමිටුවේ යෝජනාවක් අනුව මෙය ඉදිරිපත් කැර තිබිණි.
පක්ෂ නායක රැස්වීමේදී දීර්ඝ ලෙස සාකච්ඡා කිරීමෙන් පසුව මෙම යෝජනාව ඉවත් කර ගැනීමට තීරණය කරගත් බව කථානායක කාර්යාලය දැනුම් දී ඇත. මහජන අදහස් ද සැලකිල්ලට ගනිමින් මෙම යෝජනා ඉදිරියේදී සකස් කිරීම සුදුසු බව කථානායක කරු ජයසූරිය මහතා දැනුම් දී ඇත.
නමුත් මාදිවෙල මන්ත්‍රී නිවාස සංකීර්ණයේ නිවාස හිමි නොවූ මන්ත්‍රීන් 7 දෙනකු වෙනුවෙන් කිසියම් සාධාරණයක් ඉටු කිරීමට කටයුතු කරන බවටද එහිදී එකඟතාවය පළවී ඇත.
