චිත්‍රපට පසුබිම් ගායනයට නැතුවම බැරි හඬක් හිමි උරේෂා රවිහාරිගේ උපන්දිනේ අද. උපන් දිනේට මොකද කරන්නේ සහ මේ දවස්වල වැඩ කටයුතු ගැන හදසර අපි උරේෂා එක්ක කතා කළා.
කොහොමද ඉතින් ජීවිතේ
ගොඩාක් හොඳින් සතුටින් ගත කරනවා
උපන් දිනේට උරේෂාගෙන් රසික රසිකාවියන්ට මුකුත් නැද්ද ?
ඇයි නැත්තේ. මගේ අලුත්ම ගීත දෙකක් නිකුත් කරනවා අද. එකක නම් video එකකුත් තියෙනවා. ඒ ශෘංගාර සන්ද්‍යාව ගීතයේ. අනෙක් ගීතය මේ සිහිනය. ඒ ගීතයේ නම් Audio පමණයි නිකුත් වෙන්නේ.
අපි ඒ ගීතවල පද රචනය සහ සංගීතය ගැනත් මතක් කරමු?
ශෘංගාර සන්ද්‍යාව ගීතයේ පද - ෂෙහාන් ගලහිටියාව. සංගීතය - සංඛ දිනෙත්. මේ සිහිනය ගීතයේ පද - නෙලූ ප්‍රනාන්දු. සංගීතය - දර්ශන වික්‍රමතුංග.
අපි රූප රචනාව ගැනත් මතක් කළොත්
ඔව් ඇත්තටම මට ඒ ගැන කියන්න ඕනේ. දැන් බොහොමයක් රූප රචනා තුළ තියෙන්නේ කිසියම් කතාවක්. ඇතැම් රූප රචනා දිහා බැලුවම ඒ හරහා ගීතයේ අර්ථයට හානියක් වෙලා තියෙනවා. ඒ නිසා මම මගේ මේ ශෘංගාර සංද්‍යාව ගීතයට එහෙම කතාවක් එකතු කළේ නෑ. ගීතය ගයනා කරන්නෙත් මම විතරයි රූප රචනාවේ ඉන්නෙත් මම විතරයි.
මේ දිනවල උරේෂා ගී ගයන ආදරණීය කතාවක් තිරගත වෙනවා ඒ ගැනත් මම කියන්න ඕන.
මම මේ අවස්ථාවේ ප්‍රියන්ත කොළඹගේ සහ චමින්ද ගමගේ මතක් කළ යුතුයි. මට මේ චිත්‍රපටයට ආරාධනා කළේ ඒ අය. ගීත තුනක් මම ගායනා කළා. එකිනෙකට වෙනස් ආදරය තුළ තියෙන සතුට දුක හැඟීම්බර බව ඒ ගීත තුළ අන්තර්ගතවෙලා තියෙනවා. ආදරණීය කතාවක් චිත්‍රපටය සැබැවින්ම ආදරණීයයි.
කොහොමද ලැබෙන ප්‍රතිචාර
ඉතාමත් හොඳ ප්‍රතිචාර ලැබෙනවා. අද වෙනකොට දින 16ක් තිරගත වීම ආරම්භවෙලා. ඉතින් සතුටුයි. මොකද සංගීතමය චිත්‍රපටයක්.
සංගීත අධ්‍යක්‍ෂණය කළේ සිනමාවට නවකයෙක්
ඔව් උදාර සමරවීරගේ පළමු සංගීත අධ්‍යක්‍ෂණය. නමුත් ඔහු ඉතා හොඳින් චිත්‍රපටය පුරාම සංගීතය එක් කරලා තියෙනවා. එහි සාර්ථකත්වය ප්‍රේක්‍ෂකයින්ටම දකින්නට පුළුවන් චිත්‍රපටය බැලුවොත්.
දැනට උරේෂා චිත්‍රපට කීයක ගීත ගයනා කරලා තියෙනවද?
චිත්‍රපට 104 ක විතර
ඒ අතරින් කැමතිම ගීතය
මම ගයනා කරපු හැම ගීතයක්ම මට විශේෂයි සහ මම කැමතියි. ඒ අතරිනුත් ගීතයක් ගැන කියනවනම් පායන ඉර පාන කාගේ ගීතයට කැමතියි.
හේතුව
ඒ ගීතය තුළින් මම අලුත් ජීවයක් ලැබුවා කියලා මට හිතුණා. ඒ වගේම මගේ සංගීත ගුරුවරයා විදියට මම සලකන රෝහණ වීරසිංහ මහතා තමයි සංගීතවත් කළේ. පද පෙළ බන්දුල නානායක්කාරවසම්ගේ. චිත්‍රපටය අංජලිකා. අධ්‍යක්‍ෂණය - චන්න පෙරේරා මේ සියලු එකතුවටම මම කැමතියි.
ඔබ මෑත කාලේ ඉන්න වාසනාවන්තම ගායිකාවක් කිව්වොත් උරේෂා මොකද කියන්නේ?
ඇත්තටම ඔව්. මටත් එහෙම හිතෙනවා. මොකද මට ච?ිත්‍රපට රුසක ගීත ගයනා කරන්න අවස්ථාව ලැබුණා. ඒ වගේම ඒ දේවල්වලට සම්මාන ලැබුණා. ඇගයීම්වලට ලක් වුණා. ඉතින් මේ තරම් දුරක් එන්න ලැබීම වාසනාවක් විදියට මමත් දකිනවා.
උරේෂා ගේ පියා අපිට ඉන්න ප්‍රවීණ නිවේදකයෙක්. ඔබ නිවේදන කලාවට ආස නැද්ද?
නැහැ. ඇත්තටම මම කුඩා කාලෙදිත් කරලා තියෙන්නේ සින්දු කිය කියා නටන එක. ඒ නිසා තමයි මගේ මව්පියන් මාව සංගීත පැත්තට යොමු කළේ. මම අදත් කැමතිම මගේ තාත්තගේ නිවේදන විලාසයට. නමුත් මගේ ලොකු ආසාවක් නැහැ.
නිවේදන කටයුතු කරලම නැද්ද?
තියෙනවා. මම ගුවන් විදුලියේ සහන නිවේදිකාවක් විදියට තේරුණා. හැබැයි මාස තුනක කාලයක් තමා මම ඒ සඳහා ගියේ.
දැන් හැදෙන ගීත ගැන මොකද හිතෙන්නේ
හොඳ ගීතත් නිර්මාණය වෙනවා. එක රැල්ලකට යන ගීතත් තියෙනවා. මම කොහොමත් රැල්ලට ගීත ගයනා කරන්නේ නෑ. ඒ දේවල්වලට මම පෞද්ගලිකව අකමැතියි. නමුත් තනි මට ඒවා වෙනස් කරන්න බෑ.
අලුතින් බොහෝ අය එනවා ක්‍ෂේත්‍රයට. ඒ ගැන මොකද හිතෙන්නේ?
ඇත්තටම ඒක හොඳයි. මොකද ඕනෑම ක්‍ෂේත්‍රයක පැවැත්ම තියෙන්නේ අලුත් අය ආවොත් තමයි. අනික් දේ තමයි අපේ කාලේ වගේ නෙවෙයි. ක්‍ෂේත්‍රයට එන්න විවිධ මාවත් තියෙනවා. දක්‍ෂයින් ඒ හරහා බිහිවෙනවා. මම ඒ අලුත් අය සමඟ වැඩ කරලා තියෙනවා. ඒ ගැන සතුටුයි.
ඔබේ නිර්මාණ ඇතුළත් ප්‍රසංගයක් කරන්න අදහසක් නැද්ද ?
බොහෝ දෙනෙක් ඔය දේ අහනවා. මාත් දැන් මේ ක්‍ෂේත්‍රයට ඇවිත් අවුරුදු 25 ක්. මම ආවේ අවුරුදු 8 දී. ඉතින් මගේ හිතෙත් අදහසක් තියෙනවා ප්‍රසංගයක් කරන්න. ලබන වසරේදී නම් අනිවාර්ෙයන්ම ප්‍රසංගයක් කරන්න බලාපොරොත්තු වෙනවා.
ඉදිරි වැඩ කටයුතු මොනාද?
මම ගීත ගයනා කළ චිත්‍රපට 20ක් විතර තව එන්නත් තියෙනවා. ඒ වගේම ප්‍රියන්ත කොළඹගේ ගේ දේදුණු ආකාසේ චිත්‍රපටයෙත් මම ගීත ගයනා කරනවා. තව සෝමරත්න දිසානායක මහතාගේ අලුත්ම චිත්‍රපටය ස රි ග ම ප ඒ චිත්‍රපටයෙත් මම ගී ගයනවා. ඊට අමතරව ටෙලි නාට්‍ය රැසක තේමා ගීත ලැබිලා තියෙනවා.
පවුලේ විස්තර
මගේ මහත්තයා රැචිර නදීර. ඔහු විශේඥ වෛද්‍යවරයෙක්. මේ දිනවල විදෙස් ගතව ඉන්නේ. පුතා සසෙන් ප්‍රවිවෙක් දැන් එයාට අවුරැදු තුනහමාරක් වෙනවා. ඒවගේම මගේ ආදරණීය අම්මා තාත්තා මතක් කරන්නම ඕනේ. මොකද එදා වගේම අදත් මගේ සෙවණැල්ල වගේ ඉඳන් මට සහයෝගය දෙනවා.
කොහොමද රැචිරගෙන් ලැබෙන සහයෝගය
ඇත්තටම ඒ ගැනත් කියන්නම ඕන. මම හරි වාසනාවන්තයි ඔහු වගේ කෙනෙක් ලබන්න. මට මේ සියලු කටයුතුවලට ලොකු සහයෝගයක් දෙනවා.
අනාගත බලාපොරොතු මොනවද?
හොඳ ගීත කරන්න තමා මගේ බලාපොරොත්තුව. ඒවගේම මගේ දරැවා එක්ක මගේ මහත්තයා එක්ක හොඳින් යහපත් විදියට ජීවත් වීම.
අනූෂා රණසිංහ
සේයාරූ - සුමුදු හේවාපතිරණ
